Búgingi tańda Qazaqstan men Grekııa arasyndaǵy saýda-ekonomıkalyq yntymaqtastyqtyń ózara tıimdi áleýeti áli de mol jáne kólik, aýyl sharýashylyq, týrızm men qarjy salalarynda aıtarlyqtaı ósý kórsetkishteri barshylyq. Atalǵan áleýetti paıdalanýdyń joldary týraly Afınada ótken Qazaqstan-Grekııa ekonomıkalyq jáne tehnologııalyq yntymaqtastyq jónindegi úkimetaralyq komıssııasynyń (ÚAK) 4-shi otyrysy aıasynda múddeli suhbat boldy, dep habarlaıdy Syrtqy ister mınıstrliginiń baspasóz qyzmeti.
Búgingi tańda Qazaqstan men Grekııa arasyndaǵy saýda-ekonomıkalyq yntymaqtastyqtyń ózara tıimdi áleýeti áli de mol jáne kólik, aýyl sharýashylyq, týrızm men qarjy salalarynda aıtarlyqtaı ósý kórsetkishteri barshylyq. Atalǵan áleýetti paıdalanýdyń joldary týraly Afınada ótken Qazaqstan-Grekııa ekonomıkalyq jáne tehnologııalyq yntymaqtastyq jónindegi úkimetaralyq komıssııasynyń (ÚAK) 4-shi otyrysy aıasynda múddeli suhbat boldy.
Komıssııanyń teń-tóraǵalary – Qazaqstan Syrtqy ister mınıstriniń orynbasary Roman Vasılenko men Grekııa Syrtqy ister mınıstriniń Birinshi orynbasary Georgıos Katrýgalos - birlese atqaratyn jumystyń baǵyttaryn aıqyndap, saýda-ekonomıkalyq jáne ınvestısııalyq yntymaqtastyqty nyǵaıtý taqyryptaryna jan-jaqty toqtaldy. Sondaı-aq Grekııanyń Qazaqstannyń memlekettik baǵdarlamalaryna qatysý múmkindigi talqylanyp, grekııalyq qarjy ınstıtýttardyń «Astana» Halyqaralyq qarjy ortalyǵymen tyǵyz yntymaqtastyǵy jónindegi perspektıvalary qarastyryldy.
Sońǵy eki jylda, ıaǵnı 2015-16 jyldary belgili bir quldyraýdan keıin, ekijaqty saýdada oń úderis baıqalady. 2017 jyly taýar aınalymy 2016 jylmen salystyrǵanda 10,5 paıyzǵa, ıaǵnı 980,6 mln. dollarǵa (onyń ishinde qazaqstandyq eksport – 964 mln. doll.) ulǵaısa, al 2018 jylǵy qańtar-shilde aılarynda, ótken jyldyń uqsas kezeńimen salystyrǵanda, 20 paıyzǵa ósti (saýda kólemi – 750 mln. doll., QR-dan eksport – 737,6 mln. doll.). Sondaı-aq, jýyrda Qazaqstanda kún elektr stansııalaryna arnalǵan fotoelektrıkalyq keshenderdi daıyndaý, teńiz ken oryndaryn óńdeý boıynsha ınjınırıng jáne kirpish shyǵarý sııaqty salalarda birqatar jańa birlesken qazaq-grek óndiristeri iske qosyldy.
Afınada ótken kelissózderde ekijaqty sharttar bazasynyń búgingi kúıi men ony barynsha keńeıtý máselesine mańyzdy kóńil bólindi.
Sonymen qatar, ótken is-sharada Qazaqstannyń Eýrazııalyq Ekonomıkalyq Odaǵyndaǵy músheligin eskere otyryp, eki el arasyndaǵy yntymaqtastyqtyń perspektıvalary, sondaı-aq taraptardyń «Beldeý men jol» bastamasyn júzege asyrý turǵysynan ózara is-qımyldy iske asyrý máseleleri jan-jaqty talqylandy.
Komıssııa otyrysyna Qazaqstannyń mádenıet jáne sport, aýyl sharýashylyǵy, ınvestısııalar jáne damý mınıstrlikteriniń laýazymdy tulǵalary qatysty.
Otyrystyń qorytyndysy boıynsha taraptardyń qol jetizgen negizgi ýaǵdalastyqtary bekitilgen, onyń ishinde jaqyn arada Qyzmettik pasport ıelerin vızalyq talaptardan bosatý týraly kelisimge qol qoıý máselesi de engizilgen Úkimetaralyq komıssııanyń hattamasyna qol qoıyldy.
Grekııanyń týrızm salasyndaǵy mol tájirıbesi men Qazaqstanda týrızmdi damytýdyń 2025 jylǵa deıingi memlekettik baǵdarlamanyń, sonymen qatar týrıstik qyzmetti damytý týraly jańa zańnyń ázirlený ústinde ekenin nazarǵa ala otyryp, eki eldiń quzyretti mınıstrlikteri arasynda qol qoıylǵan Týrızm salasyndaǵy ózara túsinistik pen yntymaqtastyq týraly memorandým atalǵan is-sharanyń taǵy bir praktıkalyq nátıjesine aınaldy.
Kelissózder qorytyndysy boıynsha eki memlekettiń resmı tulǵalary Qazaqstan men Grekııa arasyndaǵy saıası jáne ekonomıkalyq qarym-qatynastarda tolyq ózara túsinýshiliktiń bar ekenin aıryqsha atap ótip, ortaq yntymaqtastyqty barynsha arttyrý men keńeıtýge ózara qyzyǵýshylyqtyń baryn rastady.