Nazarbaev Ýnıversıtetinde Demo Day – startapkomandalar, ónertapqyshtar jáne ınnovatorlarǵa arnalǵan Astana Business Campus «ABC Quick Start» akselerasııalyq baǵdarlamasynyń qorytyndysy boıynsha jobalardyń tanystyrylymy ótti. Demo Day sheńberinde startaptar ınvestorlarǵa jáne keń aýdıtorııaǵa ABC Quick Start akselerasııalyq baǵdarlamasy boıynsha qol jetkizgen jumys nátıjelerin ortaǵa saldy.
ABC Quick Start – bul qysqa merzimde startapty tıimdi damytýǵa baǵyttalǵan qarqyndy akselerasııa baǵdarlamasy. Baǵdarlama aıasynda akselerasııaǵa qatysýshylarǵa tálimgerlik, komandany jıyntyqtaý, startap-jobany eń basynan bastap ilgeri jyljytýǵa úıretý, sheteldik naryqtarǵa shyǵý, ABC-I2BF Seed Fund – Nazarbaev Ýnıversıteti qorynan ınvestısııalar alý múmkindigi, Nazarbaev Ýnıversıtetiniń seriktesterine qosylý, Nazarbaev Ýnıversıtetiniń FabLab, DC Lab jáne basqa zerthanalaryn, sondaı-aq keńselerin paıdalaný múmkindigi qarastyrylady.
Osy jylǵy shilde aıynyń aıaǵynda baǵdarlamaǵa qatysýǵa kelip túsken 40-tan asa ótinimniń ishinen irikteýden 13 startap-joba ótken. Jobalar energetıka, EdTech, aýyl sharýashylyǵy, medısına jáne basqa da tehnologııalyq damý oblysyndaǵy anaǵurlym ózekti salalardy qamtıdy.
ABC Quick Start III akselerasııalyq baǵdarlamasyna qatysýshylardyń qatarynda mynadaı jobalar bar. Olar, AgroGel – qumda jáne qýań jerlerde ósimdikter ósirýge arnalǵan, kiriktirilgen tyńaıtqyshy bar bıo-degradasııalanatyn gıdrogel. Alfred – ǵımarattardyń energoaýdıtin avtomatty júrgizýge arnalǵan symsyz sensorlyq júıeler. Apgrooz – reteıl kompanııalarǵa arnalǵan júk jóneltý úshin avtomobılder izdestirý boıynsha onlaın market pleıs. Blitz – ónerkásiptik óndiristerdiń ınjenerlik personalyn oqytýǵa arnalǵan servıs. Farmily – sýpermarketterde ósimdikter ósirýge arnalǵan modýldi gıdropondyq qurylǵy. HR.best – úzdik úmitkerlerdi tańdaýǵa arnalǵan HR servıs. IPrep – álemdik standarttalǵan testterge daıyndalý úshin qazaq jáne orys tilderindegi onlaın platforma. Jaybox – mobıldik kontentti úlken ekranda qoldaný úshin mını PK jáne proektordy biriktiretin qurylǵy. MiniPortier - klıentterdiń beıildilik monıtorıngi. Observer – kelýshiler aǵynyn taldaý júıesi. Symsyz – soqyr jáne nashar kóretin adamdarǵa arnalǵan ǵımarat ishinde naqty jaıǵastyrý júıesi. TOP – kompıýterlik kórý negizinde gerbısıdterdi núktelik engizý júıesi. SıVıta – elektropýnktýra jáne pýlstik dıagnostıka qurylǵysy.
Nazarbaev Ýnıversıtetiniń Tehnopark bazasynda 6 apta boıy oqytý kezinde startapkompanııalar tálimgerler men sarapshylardyń kómegimen jobalardy qarqyndy damytyp, iri kommersııalyq kelisimderge qol jetkizdi, ınvest-usynystar aldy, sondaı-aq óz jobalaryn ári qaraı tabysty iske asyrý úshin basty seriktester tapty. Is-shara aıasynda Astana Business Campus ınnovasııalyq klasteri jobalarynyń kórmesi men Startap-jobalarǵa arnalǵan kelisimder men memorandýmǵa qol qoıý rásimi ótti.
Astana Business Campus-ta ınnovasııalyq ortany damytý maqsatynda bıznes ınkýbator, bıznes akselerator, tehnopark, kommersıalaý keńsesi, zertteýlerdi súıemeldeý keńsesi, Digital Fabrication Laboratory, Digital Creativity Laboratory jáne «AstanaTehnopolıs» arnaıy ekonomıkalyq aımaǵy jumys isteıdi.
Raýan QAIDAR,
«Egemen Qazaqstan»