Dzıýdodan Bakýde ótip jatqan álem chempıonatynda jekelegen salmaq dárejeleri boıynsha jarys búgin aıaqtaldy. Erteń aralas komandalar arasyndaǵy aıqastardy tamashalaımyz.
Búgin asa aýyr salmaq dárejeleri boıynsha básekeler ótip jatyr. О́kinishke qaraı, jarys jolyna shyqqan úsh jerlesimiz de alǵashqy aınalymdarda óz qarsylastaryna ese jiberip, kórermender qataryna qosyldy. Áıelder arasynda Gúljan Isanov men Kamıla Berliqash boz kilemge shyqty. Gúljan Pýerto-Rıkonyń ókili Melıssa Mohıkadan jeńildi. Kamıla Dúnıejúzilik Ýnıversıada men Eýropa chempıonatynyń jeńimpazy, ýkraınalyq Elızaveta Kalanınaǵa jol berdi. Erler arasynda kúsh synasqan Erasyl Qajybaev tusaýkeser kezdesýinde chılılik Fransısko Solıske san soqtyrǵanymen, kelesi básekede ózbekstandyq Bekmurod Oltıboevtan oısyraı utyldy.
Osylaısha, Ázirbaıjannyń astanasynda ótken álem chempıonatynda Qazaqstannyń dzıýdoshylary qos júldege qol jetkizdi. Bul jarysta Otgonseseg Galbadrah (48 kılo) qola alsa, Erlan Serikjanov (66 kılo) kúmis medaldi moınyna ildi.
Ǵalym SÚLEIMEN,
«Egemen Qazaqstan»