О́skemende «Altai Invest-2018» halyqaralyq forýmy ótti. Mańyzdy jıynǵa Investısııalar jáne damý mınıstriniń, Ulttyq ekonomıka mınıstriniń orynbasarlary, Eýropalyq qaıta qurý jáne damý bankiniń (EQQDB) dırektory, Fransııa, Ońtústik Koreıa jáne Vengrııa elderiniń Qazaqstandaǵy tótenshe jáne ókiletti elshilerimen qatar 20 memleketten 500-den astam delegattar qatysty.
Forým aıasynda jergilikti ónimder kórmesi uıymdastyrylyp, quny 886 mıllıard teńgeni quraıtyn 110 joba shet eldik ınvestorlardyń nazaryna usynyldy. Oblys ákimi Danıal Ahmetov Fransııa, Vengrııa, Koreıa, Qytaı, basqa da elderden kelgen qonaqtarǵa jergilikti ónimderdi kórsete otyryp, aımaqtyń ınvestısııalyq áleýetimen, ınvestısııa salýǵa asa qolaıly energetıka, aǵash óńdeý, aýyl sharýashylyǵy salalarynyń múmkindikterimen tanystyrdy.
Halyqaralyq mańyzdy shara aıasynda elimizdiń irgeli kásiporyn ókilderi bir-birimen pikir almasty. Forýmǵa óńirdegi iri óndiris orny «Qazsınk» kompanııasy da belsene qatysty. «Qazaqstannyń iri kompanııalary ártúrli iskerlik máselelerin talqylap, tájirıbelerin bólisýi úshin «ALTAI INVEST» forýmy sekildi alańdar asa qajet. «Qazsınkpen» seriktes bolýǵa nıet bildirgen otandyq kásiporyndarǵa qashanda esigimiz ashyq. Satyp alý barysynda qazaqstandyq mazmundy arttyrý bizdiń basym baǵyttarymyzdyń biri bolyp qala beredi. Búginde biz jyl saıyn qazaqstandyq fırmalarmen 14 myń kelisimshart jasaıtyndyǵymyzdy maqtanyshpen aıtqym keledi. Mundaı forýmdar otandyq óndirýshilerdiń qataryn arttyra túsetinine senim mol», - deıdi «Qazsınk» JShS ákimshilik máseleler jónindegi atqarýshy dırektory Andreı Lazarev.
Azamat QASYM,
«Egemen Qazaqstan»
О́SKEMEN