Amangeldi aýdanyndaǵy Amantoǵaı jáne Jaldama aýyldaryna ortalyqtandyrylǵan taza aýyz sý qubyry keldi. Buryn osyndaǵy Keńes Odaǵy kezinde salynǵan sý qubyrynyń ábden tozyǵy jetken bolatyn.
Sý tartqyshty Arqalyq qalasyndaǵy «Allıýmınstroı» jaýapkershiligi shekteýli seriktestigi barlyǵy jyl táýliginde bitirip, 22 shaqyrym sý qubyryn tartty. Amangeldi aýdanynyń qurylǵanyna 90 jyl tolýy mereıli merekesi kezinde ortalyqtandyrylǵan sý qubyry saltanatty túrde ashyldy. Oblys ákimi Arhımed Muhambetov bul jumystyń, sý tartqysh qurylǵylardyń óte sapaly jasalǵanyn atap ótti.
«Eldi mekender úshin aýyz sý máselesi óte mańyzdy. Elbasy tapsyrmasymen aýyldardy aýyz sýmen qamtamasyz etý isi atqarylyp keledi. Sapaly atqarylǵan jumysy úshin merdigerlerge rızashylyǵymdy bildiremin. Amangeldi aýdanynyń ortaly, Esir, Amantoǵaı jáne Úrpek aýyldaryna sý qubyryn tartý úshin 2 mıllıard teńge bólip otyrmyz, olar birtindep, shetinen bitip keledi. Jol salynyp jatyr, aýyz sý keldi, jaqyn kúnderi Arqalyqtan et kombınaty ashylady. Munyń barlyǵy aýyldyń áleýetin arttyrady, eńbek etýge qolaılylyq týdyrady» dedi Arhımed Begejenuly.
Burynǵy eski qubyr kezinde Amantoǵaı aýylynyń turǵyndary kúnine 1–1,5 saǵat ǵana sý alatyn edi, endi úıge táýlik boıy móldir sý kelip tur.
«Sýdyń sapasyn aıtsaıshy. Buryn qubyr óte eski bolǵan soń, sý da mardymsyz ári sapasy tómen boldy, keıde synyp qalsa sýsyz da otyratynbyz. Endi janymyz kirip qaldy» deıdi aýyl turǵyny Gúlnaz Ábdiqadyrova.
Amantoǵaı aýylynyń aýyz sý qýanyshyna belgili akademık Kenjeǵalı Saǵadıev de ortaqtasty. Jangeldın jáne Amangeldi aýdandarynyń qurylǵanyna 90 jyl tolý toıyna qonaq bolǵan ol jerlesteriniń qýanyshyna ortaqtasyp, týǵan jerdegi ilkimdi isterdi kórý úshin osynda ádeıi at basyn burypty.
«Adam densaýlyǵynyń durys bolýyna sýdyń mańyzy zor, sýsyz ómir joq. Sondyqtan Elbasy da aýyz sý máselesine baılanysty memlekettik baǵdarlamanyń bolýyn tapsyrǵan bolatyn. Sonaý jydardan beri osy baǵdarlama jumys istep keledi. Qazaqtyń dalasy keń, aýyl, aýdandar arasy jaqyn emes, sondyqtan aýyz sý qubyryn tartý da ońaı emes, shyǵyny kóp sharýa. Degenmen sońǵy jyldary eldegi kóptegen mekenderdiń taza sýǵa qoly jetti. Bul aýyldyń, halyqtyń jaǵdaıy jaqsara túsýiniń bir ǵana kórinisi. Elbasynyń ekonomıkalyq saıasatyna rahmet aıtý kerek, barlyǵy da birtindep ornyna keledi» dedi Kenjeǵalı Ábenuly.
Aýylda taza aýyz sý qazir 230 úıdi, 7 nysandy qamtyp tur.Aýyldan ketkenderden góri, kóship kelýshilerdiń qatary kóbeıe bastady.
Názıra JÁRIMBET,
«Egemen Qazaqstan»
Qostanaı oblysy
Amangeldi aýdany