Nahchyvan avtokólik zaýyty jańa zaman talabyna saı elektromobılder jasaý jobasyn qolǵa aldy. Bul týraly kompanııa dırektory Mýsa Abdýllaev Ázerbaıjannyń «Trend» aqparattyq agenttigimen bólisti.
Jańa elektrokólikter únemdilikpen qatar qazirgi zamannyń ózekti máselesi – ekologııa tazalyǵyn da eskerip jasalmaq. Budan bólek, zaýyt jedel járdem qyzmetine arnalǵan LIFAN kompanııasynyń «mınıven» úlgisindegi mashınalaryna da tapsyrys bergen. Atalmysh mashınalardyń jınaqtaý jumysy 2019 jyly bastalmaq.
«Nahchyvan avtokólik zaýyty 2010 jyldan bastap jumys isteıdi. Nahchyvan Avtonomdy Respýblıkasyna ekonomıkalyq, áleýmettik kómek kórsetý maqsatynda qurylǵan kompanııa búginde 5000-nan kóp avtokólik jasap shyǵardy. Alǵashqy kezde kompanııa zaýytynda LIFAN markasynyń tórt úlgidegi avtokóligi ǵana shyǵarylatyn. Búginde 14 úlgidegi mashına shyǵara alatyn úlken zaýytqa aınaldy. Bizdiń kólikter zamanaýı dızaın men qaýipsizdiktiń eń joǵarǵy normalaryna saı. Avtokólik ónerkásibindegi múmkin bolǵan ekologııalyq talaptardyń barlyǵy saqtalady. Jyl saıyn qyzmet kórsetý jelisi men satylym kórsetkishi de ulǵaıyp keledi. Buǵan qosa, avtokólikterimizdiń kepildik merzimin 150 myń shaqyrym qoldanysqa deıin ulǵaıttyq», dedi kompanııa dırektory Mýsa Abdýllaev.
Qazirgi tańda kompanııa qosalqy bólshekter óndirisiniń lokalızasııasy máselesin sheshýdi. Olardyń aıtýynsha, bul zaýyttan shyǵatyn avtokólikterdiń baǵasyn arzandatýǵa múmkindik beredi.