Temirtaý qalasynyń irgesinde «Jaýyrtaýdaǵy kezdesý» atty forým-festval ótti. «Rýhanı jańǵyrý» baǵdarlamasy aıasynda uıymdastyrylǵan mádenı sharaǵa 100-den astam belsendi jas qatysty. Olardyń arasynda eriktiler, blogerler, robot tehnıkteri jáne basqalar boldy.
– Bul joba uzaq merzimge – 2021-shi jylǵa deıin josparlanǵan. Biz osyndaı festıvalderdi túrli taqyryptar boıynsha jyl saıyn ótkizýdi qolǵa almaqshymyz. Bıylǵy jyly sharany jastarǵa arnaýdy jón kórdik. Spıkerler retinde tanymal sportshylardy, bıznesmender men teologtardy shaqyrdyq. Olar sheberlik synyptar, semınarlar jáne jastarǵa tájirıbelik dárister ótkizdi, – dedi Temirtaý qalalyq mádenıet jáne tilderdi damytý bóliminiń jetekshisi Aıjan Shákenova.
Festıvalde jastar úshin bı saıystary, belsendi oıyndar men túrli saıystardan turatyn tımbıldıng baǵdarlamasy uıymdastyryldy. Sonymen qatar, shara aıasynda Temirtaý tarıhı-ólketaný murajaıynyń qyzmetkerleri HIH ǵasyrdyń orta shenindegi qazaq qystaýyn jańǵyrtý jobasyn iske asyrdy. Olar malǵa arnalǵan qora-qopsy, as ázirleıtin, jún tazalaıtyn, teri ıleıtin jáne shı toqıtyn aýmaq jasap, saman úıdiń maketin qurastyrdy.
– Bul joba – bizdiń kópjyldyq zertteýimizdiń nátıjesi. Adamdar qystaýlarda kúzdiń ortasynan mamyrdyń sońyna deıin jyldyń basym bóligin ótkizgen. Bizdiń ata-babalarymyz qandaı jaǵdaıda turǵanyn qaıta jańǵyrtyp kórsetýdi kózdedik: qarapaıym saman nemese balshyqtan soǵylǵan úıler, malǵa arnalǵan qora, sharýashylyq aýmaqtar. Árıne, saman úıdi sala almadyq, tek onyń maketin jasadyq. Ishki jabdyqtar da aıtarlyqtaı uqsas bolmady. Alaıda basqa jádigerlerdiń barlyǵy sol kezeńge saı jasaldy, – dep atap ótti murajaı qyzmetkeri Tatıana Hmelıova.
Shara barysynda Temirtaý qalasyndaǵy jeke sektordyń turǵyndary qoılary men jylqylaryn berip, uıymdastyrýshylarǵa kóp kómek kórsetti. Qonaqtardy qystaýdyń mańynda qarsy alǵan murajaı qyzmetkerlerine arnalǵan kıimder de mańaıdaǵy aýyldardan jınaldy.
Festıvaldi qyzyqtap kelgen qonaqtarǵa samaýrynnan shaı usynyldy. Sonymen qatar, olar eski tásilder boıynsha jún tútip, shı toqyp, ata-babalarymyzdyń kóneden kele jatqan kásibiniń qyr-syryna qanyqty. Eń bastysy, bıyl ǵana tusaýyn kesken forým-festıvalge qatysýshylar bir jarym ǵasyr burynǵy kezeńge saıahat jasap, tarıhı sanany jańǵyrtyp, rýhanı mol oljaǵa keneldi.
Qaırat ÁBILDA,
«Egemen Qazaqstan»
Qaraǵandy oblysy,
Temirtaý qalasy