Tarbaǵataı ólkesin sóz etkende tamyry sonaý saq dáýirlerine qaraı tereńdeı túsetin ǵasyrlar kúmbiri qulaqqa jetkendeı bolady.
О́ńirdiń tarıhı kelbeti Shyǵys Qazaqstan jerinde júrgizilgen arheologııalyq qazba jumystarynyń nátıjesinde tabylǵan jádigerlerdiń mańyzdylyǵynan-aq aıshyqtalyp turǵandaı. Almatydaǵy Ulttyq kitaphanada ótken kezdesýde elimizge belgili qalamgerler, bıznes jáne BAQ ókilderi «Tarıhqa toly Tarbaǵataı» almanahynyń tanystyrylymyn ótkizip, ǵajaıyp ólkeniń tyń derekterine qanyqty.
Kitapty arheolog Erden Oralbaı qurastyryp, jınaqtasa, kórkemdep, erekshe dızaınmen jaryqqa shyǵaryp, qoldaý kórsetýde «Asyl tas» kompanııasynyń dırektory Dýlat Tastekeevtiń eńbegi zor. Bıylǵy jyly 3-shi basylymy jaryqqa shyǵyp otyrǵan kitap jeti bólimmen tolyqtyrylǵan eken. «Altaıdan Arqaǵa deıin...» bólimine kóne zaman eskertkishteri, arheologııalyq zertteýler barysy, ǵalymdardyń zertteý maqalalary, saıahatshylardyń estelikteri ense, «Erlikke toly sol zaman» bóliminde qazaq halqynyń basqynshylarǵa qarsy erlikke toly kúresi, Shyńǵystaý men Qalbaǵa, Altaı men Tarbaǵataıǵa qaıta qonystanýy, Abylaıhan bastaǵan batyrlar joryǵy, bıler men qaharmandar týraly málimetter keltirilgen. Osylaısha óńir tarıhyn aıshyqtaıtyn «Halqymnyń qıly taǵdyry», «El ishi – óner kenishi», «Qýatty sharýashylyq, buljymas zań – el damýynyń negizi», t.b. bólimder búginde osy óńirdiń damýyna úles qosqan azamattardyń eren erlikterine arnalady.
Sharany júrgizgen Dúnıejúzi «Qazaq kúresi» federasııasy atqarý komıtetiniń tóraǵasy Talǵat Mázibaev Tarbaǵataı ólkesine qatysty kóptegen tarıhı derekterdi mysalǵa ala otyryp, qatysýshylar pikirine sóz kezegin usynyp otyrdy.
Almanah QR Memlekettik syılyǵynyń ıegeri Doshan Joljaqsynovtyń alǵy sózimen bastalypty. Al osy ıgi iske qoldaýshy bolyp júrgen Dýlat Tastekeev «Baıtaq elimizdiń ár túpkiri jaıly qazbalap zertteıin bolsaq, áli talaı kitap jazýǵa bolady. Bizdiń armanymyz - osy jobanyń úlgisimen árbir ólkeniń belsendi azamattary týǵan óńiri jaıly qyzyqty jazbalalar beretin paraqsha ashsa, sóıtip Qazaqstannyń búkil aýmaǵynda ólketaný ǵylymyn jandandyryp, ekotýrızmdi damytsa... Týǵan ólke jaıly jastarǵa bilim beretin, nasıhattaıtyn, sol arqyly otanyna degen súıispenshiligin arttyryp, el tarıhyna degen qurmetin asqaqtatatyn osyndaı áleýmettik jobalar kóbeıe bersin» degen pikirin bildirdi.
Igi jobany júzege asyrǵan azamattarǵa alǵysyn bildirgen Qazaqstannyń Eńbek sińirgen qaıratkeri Júrsin Erman, QR Ulttyq Kitap palatasynyń dırektory, jazýshy Álibek Asqarov, Qazaqstan Jazýshylar odaǵy tóraǵasynyń orynbasary Baýyrjan Jaqyp, kásipqoı boksshy Qanat Islam, t.b. Tarbaǵataı ólkesi qundy jádigerlerimen ǵana emes, eli men jeriniń keleshegi úshin eńbek etip júrgen dara tulǵalarymen de erekshelenetindigine toqtalyp, kıeli ólke kórkeıe bersin degen tilekterimen bólisti.
Elvıra SERIKQYZY,
«Egemen Qazaqstan»
ALMATY