Keshe Elbasy Qazaqstan halqyna Joldaýynda memlekettiń bedeli ishki jalpy ónimnen, ekonomıkalyq qýattan, sapaly turmystan kóriný kerek dedi. Búginge deıin ár salada qordalanǵan máselelerdi jan-jaqty aıtyp, olardyń árqaısysynyń sheshý joldaryn da kórsetti. Tıimdi jumys isteýdiń tetikterin búge-shigesine deıin talqylap, toqtalyp aıtyp berýi menińshe, úkimettiń, ákimdikterdiń, quqyq qorǵaý organdarynyń jumystaryn odan ári jetildire túsedi.
Sapaly bilim berýdiń alǵashqy qadamy balabaqshadan bastalý kerektigin aıtqan Elbasynyń sózinde úlken maqsat-murattar bar. Bilim men ǵylymǵa bólinetin aqsha ishki jalpy ónimniń on prosentine deıin ósirýdi tapsyrý bolashaq ǵylymda ekenin kórsetip berdi.
Sonymen qatar kelesi jyldy «Jastar jyly» dep jarııalaýy Joldaýdaǵy bastamalarmen tikeleı baılanysty. Joldaýda aıtylǵan máseleler tolyǵymen sheshilip, júzege assa, ol memleket úshin úlken tabys bolady. Kelesi jyly jastarǵa baılanysty sharalar tek bir ret qana ótip, umyt bolatyn jıyndar emes, keshendi jobalar bolýy kerek. Elbasy ózi usynǵan jańa gýmanıtarlyq baǵyt sııaqty uzaq merzimdi jobalar jalǵasyn tapsa dep oılaımyn. Bul jastardyń biliktiligin arttyrýda erekshe paıdaly bolar edi. Bilim-ǵylymǵa qyzyǵýshylyǵy úlken jastardy qoldaý qazir mańyzdy. О́ıtkeni medısına, ekonomıka, rýhanııat, tehnıka salalarynyń basty jetistikterin ǵalymdar jasaıdy. Al halyq sony paıdalanady. Sondyqtan keler jyly jastarǵa arnalǵan jemisti jobalar bastalady degen nıettemin.
Raýan KENJEHANULY,
«Ulttyq aýdarma bıýrosy qoǵamdyq qorynyń» atqarýshy dırektory