Almatydaǵy Dostyq úıinde Qazaqstan uıǵyrlarynyń respýblıkalyq mádenıet ortalyǵy basqarma músheleri Memleket basshysynyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýyn taldaý boıynsha keńeıtilgen jınalys ótkizdi. Is-sharaǵa Qazaqstan Halqy Assambleıasynyń músheleri, uıǵyr etno-mádenı ortalyǵyna qarasty aqsaqaldar keńesi, analar keńesiniń belsendileri jáne uıǵyr halqynyń zııaly qaýym ókilderi qatysty.
Basqosý barysynda Elbasy Joldaýynda aıqyndalǵan maqsat-mindetter men basymdyqtar mıllıondaǵan halyqtyń turmys jaǵdaıyn jaqsartýdyń taptyrmas tetigi ekendigi, Memlekettiń barlyq salasyndaǵy damýdyń jańa sapalyq deńgeıge kóterilýine kedergi keltiretin áreketterge tosqaýyl qoıyp, sıfrlyq damý dáýirine aparatyn tarıhı qujat ekendigi aıtyldy. Ásirese, Prezıdent basa aıtqan jastardyń jan-jaqty jetilýine jaǵdaı jasaý jaıy áńgimeniń ózegine aınaldy. Aldaǵy jyldyń jastar jyly dep jarııalanýy el erteńi sanalatyn óskeleń urpaqqa memleketimiz úlken qamqorlyq tanytyp otyrǵanyn kórsetedi deıdi jınalǵandar.
– Bárimiz taǵy da bir tarıhı sáttiń kýási boldyq. Buǵan deıingi Joldaýlardaǵydaı bul Joldaýda da Qazaqstan halqynyń ómirin jaqsartýǵa, turmysyn túzeýge basa nazar aýdaryldy. Prezıdentimiz, halyqtyń ál-aýqatyn arttyrýdyń eń tóte jolyn qadap aıtyp berdi. О́zimizde óndiriletin ónimderdiń qýatyn arttyrý, otandyq taýarlarǵa qoldaý kórsetý, kásippen aınalysam degen azamattarǵa jol ashý, sapaly kadrlar daıarlaý, jemqorlyqty túp-tamyrymen joıý, memlekettik qyzmetkerler men bıýdjettik sala mamandarynyń tabysyn arttyrý syndy ózekti máseleler Joldaýda túgel qamtyldy. Aldaǵy bes jyl ishinde bilim, ǵylym, densaýlyq saqtaý salalaryna jumsalatyn qarajatty ishki jalpy ónimniń 10 prosentine deıin jetkizý degen mindet elimizdegi əleýmettik salanyń damýyn jańa beleske kóteredi dep esepteımin. Búginde táýelsiz Qazaqstanymyzdy búkil álem tanıdy. Astanamyz jahandaǵy shuraıly shahardyń birine aınaldy. Munyń barlyǵy birlik pen tatýlyqtyń, Elbasymyzdyń kóregen saıasatynyń arqasynda iske asyp otyrǵan dúnıeler – deıdi Qazaqstan uıǵyrlarynyń respýblıkalyq mádenıet ortalyǵynyń tóraǵasy, Májilis depýtaty Shaımardan Nurymov .
Strategııalyq qujatta aıtylǵandaı, bilim berý júıesi men densaýlyq saqtaý salasyn jańa zaman talaptaryna saı beıimdeýdiń mańyzy zor. Joldaýda kórsetilgen jekelegen baǵyttardyń barlyǵyn biriktiretin ortaq kúsh memleket damýy. Sondyqtan, Elbasy alǵa qoıǵan maqsattardy iske asyrýda ár qoǵam múshesi belsendilik tanytý qajet deıdi jınalǵandar. Shara barysynda sóz alǵan etnomádenı birlestiktiń músheleri Prezıdent Joldaýyna qoldaý bildirip, onda kórsetilgen baǵyttar men kózdelgen maqsattar barlyq qoǵam múshelerin biriktire túsetin kúsh ekenin aıtty.
Arman OKTIаBR,
«Egemen Qazaqstan»
ALMATY