Aqtaýda oblys ákimi Eraly Toǵjanovtyń qatysýymen ustazdar kúnine arnalǵan saltanatty jınalys ótti.
Shara barysynda óńir basshysy 2 muǵalimdi «YbyraıAltynsarın», 5 muǵalimdi «Bilim berý isiniń qurmetti qyzmetkeri» tósbelgilerimen marapattady, taǵy 7 ustaz oblys ákiminiń alǵys hattaryn aldy. Sondaı-aq, Mańǵystaýda ekinshi ret ótkizilip otyrǵan «Bilim úzdigi-2018» konkýrsynyń marapattaý rásimi ótti. 18 nomınasııa boıynsha 142 muǵalim, 20 bilim uıymy qatysty. 12 nomınasııaǵa 500 myń teńge, «Jyl muǵalimi» nomınasııasyna jáne 5 bilim uıymyna 1 mıllıon teńge syılyqaqy tabystaldy. Al "Jyl muǵalimi" fınalıstine óńir basshysy tosynsyı retinde qosymsha 500 myń teńge syıaqy taǵaıyndady. Bıylǵy jyldyń úzdik ustazy jańaózendik Rametýlla Zlıha atansa, aqtyq synǵa deıin jetken esim Tilektes Serikbaıqyzy boldy.
E.Toǵjanov kúni keshe Prezıdent Nursultan Ábishuly Nazarbaev elimizdiń áleýmettik-ekonomıkalyq damýynyń ózekti máselelerin jáne qazaqstandyqtardyń ál-aýqatyn odan ári jaqsartý máselelerin qamtyǵan jańa Joldaýyn halyqqa jarııalaǵanyn atap ótti.
Kelesi jyly «Pedagog statýsy týraly» Zań qabyldaý jóninde tapsyrma bergenin barsha ustazdar qaýymy zor yqylaspen qabyldady. Bul – pedagogtar úshin erekshe qamqorlyq pen qoldaý dep bilemiz. Bilim salasyna, sonyń ishinde mektepke deıingi tárbıe men oqytýǵa erekshe kóńil bólý jóninde naqty tapsyrmalar berildi. Úsh aýysymdy jáne apatty mektepterdi joıý, oqýshy ornynyń tapshylyǵyn azaıtý maqsatynda respýblıkalyq bıýdjetten 2019-2021 jyldarǵa 50 mlrd. qarjy bólý jóninde aıtyldy, dedi óńir basshysy.
Bıyl oblystyq bilim salasynda aýqymdy sharalar atqaryldy. Bir jyldyń ózinde oblysta 9 mektep iske qosylyp, halyqtyń ıgiligine berildi. Aqtaý qalasyndaǵy №29 jańa bilim ordasy smart-mektep bolyp ashyldy. Onda STEM-laboratorııa,smart-jylyjaı, galografıkalyq aqparattandyrý buryshtary, chıp arqyly oqýshylardyń mektepke kelip-ketýin qadaǵalaý jobalary engizilip, oblys mektepterinde 17 IT synyby, 25 jylyjaı ashyldy. Bul baǵyttaǵy jumystar jalǵasyn taba bermek. Jańa oqý jylynan bastap jańartylǵan bilim mazmuny boıynsha sabaq beretin pedagogtardyń 75 paıyzy biliktiligin arttyrýǵa, oblys muǵalimderiniń 80 paıyzynyń jalaqylaryna ústem aqy qosyldy.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy