Búgin Astana qalasy ákimniń orynbasary Sergeı Horoshýn bas qaladaǵy basy daýǵa qalǵan birneshe turǵyn úı nysandaryn tekserip, qurylys kompanııalaryna tıisti eskertýler jasady. Máselen, EHRO qalashyǵynda ornalasqan «EHRO New Life» turǵyn úı kesheni kózdiń jaýyn alardaı sáýleti bolǵanymen, qonys toıyn toılaǵaly otyrǵan páter ıelerin áýrege salǵan.
Bul jóninde S.Horoshýn: «ShanHıGrýpp» JShS turǵyn úı qurylysy tártibin óreskel buzǵandyqtan ári úleskerlerdiń talaby boıynsha bul másele vedomstvoaralyq komıssııada birden qaraldy. О́zderińiz kórgendeı, budan birneshe aı buryn qurylys jumystary pysyqtalmastan eksplýatasııaǵa berilgen. Úleskerlerdiń ishki ister departamentine shaǵymdanýymen qurylys kompanııasy qatelikterin túzetýge mindetteldi. Shamamen bir aıdan keıin bul turǵyn úı kesheni tolyqtaı paıdalanýǵa daıyn bolady dep otyrmyz, deıdi.
Budan keıin Astana qalasy ákiminiń orynbasary «Pamır» turǵyn úı keshenine at basyn burdy. S.Horoshýnnyń sózine súıensek, bul nysandy salýshy kompanııa budan 1,5 jyl buryn qurylysty aıaqtaýǵa tıis bolǵan. Qarjy jaǵynan qıyndyqqa tap bolǵan «Polıtrend» JShS úleskerlerdiń úmitin aqtamaı, eń sońynda bul másele vedomstvoaralyq komıssııanyń nazaryna ilingen.
- «Pamır» turǵyn úı kesheni ortalyqtandyrylǵan jylý júıesine áli tolyq qosylmaǵan. Kún sýyp kele jatqandyqtan, qurylys kompanııasyna búgin sońǵy ret eskertý jasadym. Basqa da qandaı kemshilikter bar, bárin ońtaılandyrýǵa 2 apta ýaqyt berip otyrmyz, - deıdi qala ákiminiń orynbasary.
Alǵashynda 9 qabat dep josparlanǵan «Jańa Kóktal» turǵyn úı kesheni 5 qabatty bolyp boı kótergende qurylys kompanııasy men úleskerler arasynda túsinispeýshilik paıda bolsa, ol másele de qalanyń bas sáýlet josparyn jasaýshy mamandardyń arqasynda oń sheshimin taýypty. Jylytý, sý qubyry jáne elektr-energııa júıesi bir qalypqa keltirilgen turǵyn úı kesheninde bir aıdan keıin birneshe otbasy qonys toıyn toılamaq. Sonymen qatar, «Abaıdyń 150 jyldyǵy» turǵyn úı kesheni de qarasha aıynyń sońyna deıin tolyqtaı paıdalanýǵa beriledi dep josparlanyp otyr. Sońǵy atalǵan qos birdeı turǵyn úı kesheni byltyr isti bolǵan «Tólendi» qurylys kompanııasyna tıesili bolatyn.
- 2017 jyly Astana qalasy boıynsha problemaly 62 qurylys nysany tirkelse, vedomstvoaralyq komıssııanyń qurylyp, iske kirisýimen olardyń sany azaıa bastady. Elbasynyń tapsyrmasyna sáıkes, birqatar tegeýrindi jumystar atqarylyp, bıylǵy jyldyń basynda problemaly obektilerdiń sany 52 bolsa, qazir 29 turǵyn úı kesheniniń máselesin baqylaýda ustap otyrmyz. Onyń 28-iniń jumysy vedomstvoaralyq komıssııanyń qadaǵalaýynsyz júrmeıtinine kóz jetkizdik. Sondyqtan, bir-eki apta saıyn atalǵan obektilerdi jiti baqylap, úleskerlermen de kezdesip turamyz, deıdi qala ákiminiń orynbasary S.Horoshýn.