6 qazan AQSh-tyń memlekettik xatshysy Maıkl Pompeo Pxenıanǵa ketip bara jatqan jolda Tokıoǵa toqtap, Japonııanyń Premer-mınıstri S. Abemen kezdesip, eki jaq ta "AQSh pen Japonııa jáne Ońtústik Koreıa bop birigip, Soltústik Koreıaǵa qysym jasaýdy jalǵastyrýymyz kerek" degendi qaıtalap málimdedi.
Al dál sol tusta Soltústik Koreıanyń Syrtqy ister mınıstriniń orynbasary Chhve Son Hı óz basshysynyń arnaıy tapsyrmasymen Máskeýge ketip bara jatqan jolda Pekınge soǵyp, "Qytaı, Reseı jáne Soltústik Koreıa bop birigip, əlgi úsh el tarapynan qandaı qysym bolsa da tótep berýge daıynbyz" degendi bildirip otyr.
Alyptardy bir-birine qarsy qoıa bilgen Soltústik Koreıanyń dıplomatııasy buǵan deıin de solaı edi, budan keıin kúmánsiz Shyǵys Azııa ǵana emes, álemdik geosaıası axýaldyń eń basty elementine aınalmaq.
Soltústik Koreıany ıadrolyq qarýdan bas tartqyzý Tramp ákimshiliginiń eń basty dıplomatııalyq jetistigi bolýǵa tıis bolsa, ol kisige "renjip júrgen" Pýtın men Sı Szınpın onyń ondaı oıynyń iske aspaýyna baryn salýda.
Soltústik Koreıanyń qandaı da bir problemasyn Reseı men Qytaıdy ózine qarsy qoıý arqyly sheshý múmkin emes ekenin Vashıngton jaqsy biledi. Al Soltústik Koreıa ıadrolyq qarýdan bas tartpaıtyn jaǵdaıda Ońtústik Koreıa men Japonııadaǵy AQSh-tyń qarýly kúshteri kóbeımese azaımaıtynyn Máskeý men Beıjiń odan da jaqsy biledi.
AQSh, Qytaı, Reseı, Japonııa, Ońtústik Koreıa syndy myna dúnıeniń azýlylaryn kózdegenine kóndirip, óz degenine sendirip otyrǵan kip-kishkentaı Soltústik Koreıanyń dıplomatııasy ana bes alyptyń dıplomatııasynan áldeqaıda myqty bolyp turǵany dıplomatııanyń qandaı bolý kerek ekeniniń úlgisi sekildi.
Soltústik Koreıanyń dıplomatııasyn uǵyp almaı, Shyǵys Azııadaǵy xalyqaralyq qatynastardyń búgingi axýalyn túsinip, keleshegi jaıly boljam jasaý qur áýreshilik bolǵaly tur.
Jalpy, qazirgi tańdaǵy xalyqaralyq qatynastar salasynda Soltústik Koreıaǵa qatysty jaǵdaıdy baqylap otyrý ózekti máselege aınalyp otyr. Osy turǵyda koreı tili men japon tilin jetik biletin shyǵystanýshy mamandardyń bilimin durys paıdalana bilý qajet dep oılaımyn.
О́ıtkeni, bul eldi janyndaǵy Ońtústik Koreıa men Japonııadan artyq eshkim bilmeıdi.
Qaı zaman bolmasyn, qaı el bolmasyn, árqashan árkim eń aldymen óziniń basty jaýyn tanyǵan, ne aıtyp, ne dep, ne iship, ne jep otyrǵanyna deıin bilýge tyrysqan.
Qytaıdy da, qytaılar men koreılerdiń arasynda ne bolyp, ne bolmaı jatqanyn osy japon men koreıden artyq eshkim bilgen emes.
Búgingi tańda Qytaı men Qytaıdyń qoldaýyn negizgi dıplomatııalyq karta retinde paıdalanyp otyrǵan Soltústik Koreıaǵa qatysty jaǵdaı basty geosaıası orynǵa shyqqan Shyǵys Azııa aımaǵy baǵytyndaǵy dıplomatııamyzdy kúsheıtýge erekshe kóńil bólýdiń mańyzdy ekenin kórsetedi.
Batyrhan QURMANSEIIT, shyǵystanýshy