Ustaz ataýly búginde qýanýda. Elbasy muǵalimder men mektepke deıingi mekemeler qyzmetkerleri úshin barlyq ıgilikti isterdi qarastyryp, júktemeni azaıtýǵa, jónsiz tekserister men mindetten tys fýnksııalardan arashalaıtyn «Pedagog mártebesi týraly» zańdy ázirleýge tapsyrma berdi. «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty jańa Joldaýdyń jaǵymdy jańalyqtary osylaı bastalady.
Muǵalimniń abyroı bedeliniń tómendep bara jatqany jónindegi janaıqaıymyzdyń osyndaı nátıje bergenine qalaısha qýanbaımyz?! Elimizdegi bilim, densaýlyq salasynyń jaǵdaıynan jáne ondaǵy ózekti máselelerden jaqsy habardar Elbasy zań ázirleý jóninde tapsyrma berip otyr. Jasyratyny joq, sońǵy kezderi qolǵa alynyp jatqan reformalardy júzege asyrady degen muǵalimderimizdiń arasynda daý-damaımen basy qatyp, sotqa júginetinderi kóbeıe túsken bolatyn.
Muǵalimderdi balaǵattaý azdaı, taıaq jep jatqandary jóninde de aqparat quraldarynda jarııalanyp jatty. Kóshe sypyrtatyny, saılaý, sanaq degen naýqandarǵa júgirtetini de az aıtylǵan joq. Mektep dırektory men qarapaıym muǵalimniń sottasyp jatqany jóninde kóptegen derek keltirýge bolady. Zań qabyldansa, muǵalim tek negizgi mindetin atqaratyn, basqa jumysqa alańdamaıtyn bolady. Bul oraıda aıtar usynys-tilekterimiz de joq emes. Eń aldymen, atalǵan zań jobasy BAQ betterinde ashyq talqyǵa túskenin, ony daıyndaýǵa qatardaǵy muǵalimderdiń tartylǵanyn qalar edik. Sondaı-aq zańda bilim basqarmalaryn jergilikti ákimshilikten Bilim jáne ǵylym mınıstrliginiń quzyretine ótkizý máselesi qamtylsa degen usynys bar. Bul – muǵalimderdi óz mindetine jatpaıtyn jumystardan qutqaratyn birden-bir jol.
Muǵalimge qol jumsaǵan adamǵa qatań jaza taǵaıyndalýy tıis. Bıýdjetten mektepterdi jóndeýge bólingen qarajat BAQ betinde jarııalanýy qajet. Sonda muǵalimder men ata-analardan mektepti jóndeýge aqsha jınaýǵa toqsaýyl qoıylady. Mine, osyndaı máselelerdiń zańda qamtylǵanyn qalaımyz. Joldaýda aıtylǵan búkil mektepter men balabaqshalardy beınebaqylaý júıesimen qamtamasyz etý, mektep psıhologteriniń jumysyn kúsheıtý de búginde óte ózekti. Bul balalardyń qaýipsizdigin qamtamasyz etedi.
Muǵalimder ǵana emes, búkil ata-analar úsh aýysymdy mektepter máselesiniń sheshimin tabatynyna qýanýly. Bul oraıda Elbasy Joldaýynda 2019-2021 jyldary qosymsha 50 mlrd teńge bólinetini aıtyldy. Iаǵnı, naqty merzim men bólinetin qarajat kólemi ataldy. Qarapaıym halyq Joldaýda júktelgen negizgi mindetterdiń merziminde oryndalatynyna senimdi.
О́mir ShYNYBEKULY,
№41 mektep-lıseıi tarıh pániniń muǵalimi
ShYMKENT