Jýyrda Túrkistan oblysynyń maqtaly aýdandaryna jumys saparymen Aýyl sharýashylyǵy mınıstri О́mirzaq Shókeev kelgen bolatyn. Mınıstrdiń sol sapary barysynda ótken kezdesýlerde dıqandar maqta baǵasynyń tómendigin aıtyp shaǵymdanǵan-dy.
Premer-mınıstrdiń orynbasary men oblys ákimi Janseıit Túımebaevtyń aýdandarǵa jasaǵan sol jumys saparynan keıin maqtanyń baǵasy 180 teńge bolyp bekitildi. Osylaısha maqtany eksporttaýmen aınalysatyn treıderlermen arnaıy jıyn ótkizip, júrgizilgen jumystyń nátıjesinde «aq altynnyń» baǵasy 10 teńgege ósti.
Aıta ketelik, Maqtaaral aýdanynyń ákimi Baqyt Asanov pen Jetisaı aýdanynyń ákimi Jamantaı Beısenbaev ta maqtanyń baǵasyn kóterýge yqpal etý boıynsha zaýyt basshylarymen birneshe ret jınalys ótkizgen. Maqtashylardyń talap-tilegi mınıstr men oblys ákimi saparynan keıin oryndalyp otyr. Sondaı-aq maqtanyń árbir tonnasyna 12 myń teńgeden memlekettik sýbsıdııa qosa beriletin bolady.
Ǵalymjan ELShIBAI,
«Egemen Qazaqstan»