Qasym-Jomart Toqaevtyń tóraǵalyq etýimen Parlament Senaty Bıýrosynyń otyrysy boldy. Depýtattar Prezıdent N.Nazarbaevtyń Qazaqstan halqyna Joldaýyn talqylady, dep habarlaıdy Parlament Senatynyń baspasóz qyzmeti.
Senat basshysy Elbasynyń tarıhı mańyzy zor, strategııalyq Joldaýynda elimizdiń tynys-tirshiliginiń barlyq salalary boıynsha búgingi kúnniń ótkir máselelerine tereń taldaý jasalǵanyn atap ótti.
«Prezıdent Joldaýynda halyqtyń ál-aýqatyn jaqsartý, densaýlyǵyn saqtaý boıynsha jumysty jalǵastyrýdyń qajettiligine basa nazar aýdaryldy. Eń aýqymdy máselelerdiń sheshý joldary naqty aıqyndalyp, memlekettik bıliktiń barlyq tarmaqtaryna mańyzdy mindetter júkteldi», - dedi Q.Toqaev.
Memleketimizdiń ósip-órkendeýi men tynys-tirshiligi Elbasynyń turaqty nazarynda ekenin aıta kelip, Senat Tóraǵasy Joldaýda halyqtyń árbir qajettiligi anyq kórsetilgenin jáne ony sheshý tásilderi aıqyndalǵanyna toqtaldy.
Joǵarǵy Palata basshysy zań ústemdigin qamtamasyz etý jáne quqyqtyq reformany belsendi iske asyrýǵa aıryqsha mán berilgenin atap ótti. Osyǵan baılanysty Palata depýtattaryna naqty tapsyrmalar berildi.
«Elbasynyń alǵa qoıǵan aýqymdy mindetterin tıimdi júzege asyrý – qabyldanatyn zańdardyń sapasyna tikeleı baılanysty. Osy baǵytta Senat belsendi túrde qyzmet atqarýy tıis. Joldaýdy iske asyrý boıynsha bekitiletin Jalpy ulttyq jospar negizinde Senattyń tıisti jospary qabyldanatyn bolady», - dedi Q.Toqaev.
Elbasynyń Joldaýyn óńirlerde jurtshylyqpen talqylaý maqsatynda 13-21 qazan aralyǵynda elimizdiń aımaqtaryna is-saparǵa shyǵý týraly depýtattarǵa tapsyrma berildi.
Aldaǵy kezeńde Palatanyń jumysy qyza túsetin bolady. Bıýdjetti naqtylaý jónindegi zań jobasy men 2019-2021 jyldarǵa arnalǵan bıýdjet jobasy qaralady. Odan basqa, 10-11 qazanda Álemdik jáne dástúrli dinder lıderleriniń VI sezi ótedi.
Bıýro otyrysynda Májilisten túsken zań jobalary bólinip berildi. Áleýmettik-mádenı damý jáne ǵylym komıteti «Qazaqstan Respýblıkasynyń Úkimeti men Halyqaralyq Qyzyl Krest Komıtetiniń arasyndaǵy Qazaqstan Respýblıkasyndaǵy Halyqaralyq Qyzyl Krest Komıteti О́kildiginiń mártebesi, artyqshylyqtary jáne ımmýnıtetteri týraly kelisimdi ratıfıkasııalaý týraly» zań jobasy boıynsha bas komıtet bolyp belgilendi.