I.Omarov atyndaǵy oblystyq qazaq drama teatrynyń shyǵarmashylyq ujymy bıylǵy teatr maýsymyn jańa basshylyqpen bastady. Teatr dırektorlaǵyna Sabyraly Kemelbaev taǵaıyndaldy. Al bas rejısser bolyp Álııa Baımahan keldi.
Teatr Astana qalasynyń 20 jyldyǵyna oraı elordada ótken sharalarǵa belsene qatysty. 4-5 jyldan beri respýblıkalyq teatr festıvalderine qatyspaǵan ujym, keler baıqaýlarǵa qoıylymdar daıyndaýdy kózdep otyr. Teatrdyń ashylǵanyna 20 jylǵa jýyq ýaqyt boldy. Osy jyldar ishinde 15 jyl boıy sahnadan túspeı kele jatqan, kórermender suranysymen jıi qoıylatyn shyǵarmalar bar. Degenmen osy jyldar ishinde sahnadaǵy ǵumyry uzaq bolmaǵan, talǵamsyz qoıylǵan qoıylymdar da boldy. Teatrǵa jańa dırektor, jańa kórkemdik jetekshiniń kelýine baılanysty, óner ordasynyń shyǵarmashylyq ujymy kórermen kóńilinen shyǵý úshin jumysty barynsha shıratyp, jańasha josparlaýǵa, júrgizýge betburys jasady.
«Teatrdyń óner ujymynyń shyǵarmashylyq áleýeti joǵary, barlyǵy da óz isiniń mamandary. Repertýar barlyq teatrlardaǵy sekildi bizde de irikteýdi, tańdaýdy qajet etedi. Ony jańa rejısser aldaǵy ýaqytta damyta túsetin bolady. Kórermen kóńilinen shyǵý úshin jumysty uıymdastyrýdyń jańa ádisterin, sıfrlandyrý jetistikterin, kórermen suranysyn zertteý sekildi jan-jaqty jumys isteımiz. Teatr aldaǵy ýaqytta gastrolge jıi shyǵatyn bolady. Sonda biz kórermenge jaqyn da bolamyz, ári shyǵarmashylyq jaǵynan shyńdala da túsemiz» dedi teatr dırektory Sabyraly Kemelbaev óńirlik kommýnıkasııa qyzmetiniń aqparattyq alańyna kelip, jýrnalısterge bergen suhbatynda.
Názıra JÁRIMBET,
«Egemen Qazaqstan»
Qostanaı