Qaraorman qazaqtyń qamyn kúıttep, ulttyń uly sózin sóılep ótken namys naızaǵaıy, asa kórnekti jazýshy jáne memleket qaıratkeri Sherhan Murtaza ómirden ozdy. Eki kúnnen beri qalyń qazaq aza tutyp, birtýar perzentin joqtap jatyr. Qazan aıynyń qara sýyǵynda kelip jetken bul qaraly habar báribir alyp báıterekti qulata almaıdy, móldir bulaqty sýalta almaıdy. Sebebi, Sherhan Murtaza aqıqattyń aldaspany, shyndyqtyń shyraqshysy bola bilgen alyp tulǵa edi.
Halqy Sheraǵa dep qasterlegen, qurmet tutqan tulǵamen qoshtasý ońaı emes. Atyraý men Altaı, Alataý men Arqa arasyndaǵy qaraorman qazaqpen birge Áýlıeata halqy da ardaqty azamatyn azalady. Qaıratker tulǵamen Taraz qalasyndaǵy «Jeńis» saıabaǵynda Jambyl jurtshylyǵy qımaı qoshtasty. Saıabaqtaǵy Sherhan Murtazanyń úlken portreti salynǵan bannerge áýlıeatalyqtar gúl shoqtaryn qoıyp, marqumnyń rýhyna taǵzym etti. Sonymen qatar, osynda jazylǵan Elbasynyń «Sherhan Murtaza búkil ǵumyryn tól ádebıetimiz ben mádenıetimizdiń damýyna arnaǵan birtýar azamat, qazaqtyń muńyn muńdap, joǵyn joqtaǵan nar tulǵaly qalamger, qarymdy qoǵam qaıratkeri boldy. Ult rýhanııatynda ózindik qoltańbasy bar zańǵar jazýshy sońyna mol mura, óristi ónege qaldyrdy» degen sózi Sherhan rýhyn asqaqtatyp turdy.
Áýeli Jambyl oblystyq ardagerler keńesi tóraǵasynyń orynbasary Sansyzbaı Jorabekov sóz alyp, ańyz tulǵanyń qaıratkerlik jolyna toqtaldy. Ár jyldary elimizdiń bas basylymdaryn basqaryp, odan keıin depýtat bolǵan Sherhan Murtazanyń ulty úshin uly ister atqarǵanyn atap ótti. Al óz sózinde «Nur Otan» partııasy Jambyl oblystyq fılıaly tóraǵasynyń orynbasary Shábden Tileýmurat Sheraǵańnyń aqıqat pen shyndyq jolynda aıanbaı kúresken birtýar tulǵa ekenin eske aldy. Budan keıin Jambyl oblystyq qazaq drama teatrynyń dırektory Bolat Bekjanov, Talas aýdanynyń Qurmetti azamaty Úmit Bıtenova, Qazaqstan Jazýshylar odaǵynyń múshesi Baımahanbet Ahmet aramyzdan alystap bara jatqan aıaýly tulǵa jaıynda júrekjardy syrlarymen bólisti. Sonymen qatar, Sherhan Murtazanyń jazýshylyq, qaıratkerlik taǵdyry týraly aıtyldy.
«Meni adam qataryna qosaıyn degen eshkim bolǵan joq. Kóp shetqaqpaı kórdim. Meni taǵdyr jeteledi» dep tolǵanypty kezinde Sherhan Murtaza. Taǵdyry bólek, bitimi erek tulǵany taǵdyrdyń ózi synady, ózi qalyptastyrdy. «Shyndyq eshqashan shirimeıdi» deıdi taǵy birde. Shyndyqty shyrqyratyp aıtyp, arystandaı arqyraǵan alyp tulǵanyń esimi eshqashan umytylmaıdy. Qazaqtyń máńgi júreginde bola bermek.
Hamıt Esaman,
«Egemen Qazaqstan»
Jambyl oblysy