Syrtqy ister mınıstri Qaırat Ábdirahmanov Eýropadaǵy qaýipsizdik jáne yntymaqtastyq uıymynyń Bas hatshysy Tomas Gremıngermen kezdesti. EQYU joǵary ókili qalyptasqan dástúr boıynsha Prezıdent Nursultan Nazarbaevtyń bastamasymen ótkizilip jatqan Álemdik jáne dástúrli dinder kóshbasshylarynyń VI seziniń jumysyna qatysýda.
T.Gremınger Astananyń qazirgi jaǵdaıda asa ózekti bolyp otyrǵan jahandyq dinaralyq jáne konfessııaaralyq únqatysýdy nyǵaıtýdaǵy kúsh-jigerin quptady.
Bas hatshy «ásirese kópjaqtylyq úlken qysymǵa ushyraǵan kezeńde» Uıymǵa shynaıy beıildiligi men turaqty túrde qoldaý kórsetip jatqany úshin Qazaqstanǵa alǵysyn bildirdi.
Q.Ábdirahmanovtyń aıtýynsha, Qazaqstan EQYU-ny qazirgi zamanǵy halyqaralyq qatynastar júıesindegi mańyzdy jáne suranysqa ıe uıymdardyń biri dep sanaıdy. Uıym keıbir elderde qaıshylyqtardy eńserip, janjaldar sheshilýi úshin odan da kóp nárse jasaı alady. Osyǵan baılanysty qazaqstandyq tarap bitimgershilik mıssııasyn jalǵastyrýǵa daıyn. Astana sammıtiniń murasyn eskere otyryp, jańa quqyqtyq baza negizinde Eýroatlantıkalyq jáne Eýrazııalyq keńistiktegi qaýipsizdikti nyǵaıtý jónindegi kelissózderdi bastaý – óte mańyzdy. Ol qaýipsizdiktiń úsh ólshemi, qurylymdyq dıalogti talqylaý, terrorızmge jáne transulttyq qaýip-qaterlerge qarsy áreket etý, ornyqty damýǵa járdemdesý, adam quqyqtaryn qorǵaý máseleleri shuǵyl túrde qatysýshy memleketterdiń kúsh-jigerin shoǵyrlandyrýdy talap etetinin atap ótti.
Syrtqy saıası vedomstvo basshysy senim men ózara túsinistikti nyǵaıtýǵa yqpal etetin EQYU qurylymdaryn Uıym jaýapkershiliginiń búkil aımaǵynda teń jaǵdaıda ornalastyrý mańyzdylyǵyna toqtaldy. Bolashaqta mundaı qurylymdardyń biri retinde EKSPO ınfraqurylymynyń bazasynda ekonomıkalyq baılanys, tıimdi basqarý, jasyl ekonomıka, apat jáne energetıkalyq qaýipsizdik qaterin azaıtý salasyndaǵy ozyq tájirıbemen almasýǵa negizdelgen EQYU-nyń Taqyryptyq ortalyǵyn qurýǵa bolar edi. Qazaqstan EQYU-nyń Ekonomıkalyq-ekologııalyq komıtetin basqaryp kele jatqanyna eki jyl boldy jáne Prezıdent N.Nazarbaevtyń Qazaqstan halqyna jaqynda jasaǵan Joldaýynyń turǵysynan kólik ınfraqurylymyn, tranzıttik áleýetti, týrızmdi damytý boıynsha jobalarǵa óz seriktesterin shaqyrýǵa nıetti.
«Egemen-aqparat»