Baqytjan Saǵyntaevtyń tóraǵalyǵymen ótken Úkimet otyrysynda qarjy mınıstri Á. Smaıylov pen ulttyq ekonomıka mınıstri T. Súleımenov jekeshelendirýdi júrgizý barysy týraly baıandady.
Qarjy mınıstri Álıhan Smaıylov Jekeshelendirýdiń keshendi josparyn oryndaý barysy, jekeshelendirý prosesin jyldamdatý boıynsha qabyldanǵan sharalar men onyń qazirgi jaǵdaıy týraly baıandady. Qazirgi ýaqytta Jekeshelendirýdiń keshendi josparynyń 887 nysanynyń 524-i saýda-sattyqqa shyǵarylyp, olardyń 444-i satyldy. 287 nysan qaıta uıymdastyrylý jáne taratylý satysynda. 12 nysandy jekeshelendirý tizbesinen alyp tastaý týraly QR Ekonomıkany jańǵyrtý máseleleri jónindegi memlekettik komıssııanyń sheshimi qabyldandy.
«Qaıta uıymdastyrylatyn jáne taratylatyn nysandardy qosa eseptegende, Jekeshelendirýdiń keshendi josparynyń oryndalýy búginde 83,7% quraıdy», — dedi Á. Smaıylov.
Bıyl 257 nysandy saýda-sattyqqa shyǵarý josparlanǵan. Is júzinde 137-si shyǵaryldy jáne 47 nysan boıynsha qaıta uıymdastyrý jáne taratý týraly sheshim qabyldandy. Budan ózge, avtokólik joldary salasyndaǵy 14 jaýapkershiligi shekteýli seriktestik (Qazaqavtojol) boıynsha biryńǵaı lotpen jekeshelendirý týraly usynys engizilip, olardy bir seriktestikke qaıta qurý boıynsha jumys júrgizilýde. Saýda-sattyqqa shyǵarylǵan nysandardyń ishinen osy jyly 63-i satyldy. Satý baǵasy 74 mlrd teńgeni qurady.
О́z kezeginde, jalpy jekeshelendirýge jatatyn 63 top nysannyń búgingi kúnge deıin 17-si satyldy. Satý baǵasy 125 mlrd teńgeni qurady. Bıyl 39 top nysan satýǵa josparlanyp otyr. Olardyń 16-sy saýda-sattyqqa shyǵaryldy jáne ekeýi Memlekettik komıssııa sheshiminiń negizinde tizimnen alynyp tastaýǵa jatady. Saýda-sattyqqa shyǵarylǵan top nysandardyń osy jyly tórteýi satyldy. Qalǵan nysandar boıynsha satý aldyndaǵy daıyndyq jáne áleýetti satyp alýshylarmen kelissózder júrgizilýde.
Jekeshelendirý prosesin jedeldetý boıynsha qabyldanǵan is-sharalar týraly baıandaı otyryp, qarjy mınıstri QR Úkimetiniń 17 shildedegi otyrysynyń qorytyndysy boıynsha bir aı merzimde satý merzimderin aǵymdaǵy jyldyń sońynan qyrkúıek–qazan aılaryna aýystyra otyryp, jekeshelendirýdiń jol kartalaryn qaıta qaraýǵa, sondaı-aq josparlanǵan nysandardy osy jyldyń sońyna deıin tolyq satýdy qamtamasyz etýge tapsyrma berildi.
Monıtorıng derekterine sáıkes tamyz aıynyń basynda saýda-sattyqqa shyǵarý merzimderi 2018 jyldyń sońyna josparlanǵan kommýnaldyq menshiktegi, ulttyq holdıngter men áleýmettik-kásipkerlik korporasııalardyń 33 nysany boldy. Júrgizilgen jumys nátıjesinde satýshylar 31 nysan boıynsha saýda-sattyqqa shyǵarý merzimderin túzetip (osy jyldyń 1 qarashasynan keshiktirmeı), taratylýǵa jatatyn nysandar boıynsha is-sharalardy jedeldetti.
«QR Ulttyq ekonomıka mınıstrliginiń Keshendi josparǵa júrgizgen túgendeýleriniń nátıjesinde ony taǵy da 48 jekeshelendirý nysanymen tolyqtyrý kózdelgen. Bul respýblıkalyq, kommýnaldyq jáne áleýmettik-kásipkerlik korporasııalardyń menshigindegi nysandar», — dep Á. Smaıylov, qabyldanǵan jaǵdaıda nysandar jyldyń aıaǵyna qaraı satýǵa shyǵarylyp, 2019 jyldyń qańtar–aqpan aılarynda satylýy boljamdalǵanyn aıtty.
Qorytyndylaı kele, qarjy mınıstri jekeshelendirý prosesiniń jalpy turaqty qarqynmen júrgizilip jatqanyn atap ótti. Osy jyldyń sońyna deıin saýda-sattyqqa shyǵarylatyn 54 nysan qaldy, onyń ishinde respýblıkalyq menshiktegi 12 nysan, kommýnaldyq menshiktegi 12 nysan jáne ulttyq holdıngter men áleýmettik-kásipkerlik korporasııalardyń 30 aktıvi.
Ulttyq ekonomıka mınıstri T. Súleımenov, óz kezeginde, úsh saýda-sattyqtyń nátıjeleri boıynsha satylmaǵan nysandar taratylýǵa jatatynyn atap ótti. Alaıda, búgingi tańda taratý týraly sheshimi joq nysandar bar. Osyǵan baılanysty, memlekettik organdar bıyl jekeshelendirýdi aıaqtaý ne taratý jónindegi jumysty jandandyrýy kerek.
Sonymen qatar, Memleket basshysynyń tapsyrmasyna sáıkes, kvazımemlekettik sektor nysandaryn túgendeý tolyq júrgizildi, oǵan sáıkes 621 uıymdy qysqartý usynylǵan.
Jekeshelendirýge usynylǵan 172 nysannyń 48-i Jekeshelendirýdiń keshendi josparyna engiziledi. Atalǵan nysandardy 2019 jylǵy I jarty jyldyqtyń sońyna deıin satýdy usynylady. Qalǵan 124 nysan básekeles ortaǵa ishki korporatıvtik rásimder sheńberinde shyǵarylatyn bolady.
Budan ózge, T. Súleımenov jekeshelendirý turǵysynan zańnamany jetildirýge qatysty sharalar jaıynda aıtyp berdi. Máselen, Memleket basshysynyń memlekettik nysandardy naryqtyq qunnan tómendetpeı satýǵa qatysty tapsyrmasyn oryndaý aıasynda Azamattyq kodekske jáne «Memlekettik múlik týraly» zańǵa túzetýler ázirlendi, onda alǵashqy saýda-sattyqtyń bastapqy qatysýshysyna jekeshelendirý nysandaryn bastapqy baǵasynan tómendetpeı satýǵa quqyǵy qarastyrylǵan.
Budan ózge, úsh saýda-sattyq nátıjesi boıynsha satylmaǵan áleýmettik mańy bar nysandardy saqtap qalý múmkindigin belgileý maqsatynda memlekettik múlik jónindegi ýákiletti organǵa nemese jergilikti atqarýshy organǵa (aktıvterdiń tıesililigine baılanysty) monopolııaǵa qarsy organmen kelise otyryp, ótkizilgen úsh aýksıonnyń qorytyndysy boıynsha satylmaǵan memlekettik uıymdy saqtaý qajettiligi týraly sheshim qabyldaý quzyretin berý usynylady.
Máseleni qaraý qorytyndysy boıynsha, Premer-Mınıstr B. Saǵyntaev jalpy nysandardyń satylymy kestege sáıkes júrgizilip jatqanyn aıtty. Degenmen, ortalyq memlekettik jáne jergilikti atqarýshy organdar men holdıngter keıbir nysandardy jekeshelendirý merzimderine nazar aýdaryp, olardyń satylymǵa shyǵarylýyn jeteldetýi kerek. Sondaı-aq, Prezıdent tapsyrmasyna sáıkes, jekeshelendirý memleket úshin barynsha tıimdi bolýy tıis.