Memleket basshysy Nursultan Nazarbaevtyń Fınlıandııa Respýblıkasyna resmı sapary aıasynda Qazaqstan mashına jasaýshylar odaǵy men Fınlıandııa salalyq tehnologııalar federasııasy arasynda mashına jasaý salasynda ózara is-qımyl jáne yntymaqtastyq týraly memorandýmǵa qol qoıyldy.
Bul ekonomıkanyń kóptegen salalarynda, atap aıtqanda, ınjınırııa, startap jobalar, jańa tehnologııalar, ınnovasııa men mashına jasaý salalaryndaǵy 1600 kásiporynnyń jumysyn úılestirip otyrǵan federasııamen kelisimniń bolashaǵynan zor úmit kútilýde. Qazaqstan mashına jasaýshylar odaǵynyń basqarma tóraǵasy, Májilis depýtaty Meıram Pishembaevtyń aıtýynsha, jańa kelisim eki el arasyndaǵy bıznes jobalardyń damýyna serpin berýi tıis. Sonymen qatar, Fınlıandııa salalyq tehnologııalar federasııasyn «Nokia» kompanııasynyń dırektorlar keńesiniń tóraǵasy Rısto Sıılasmaanyń basqarýy qazaqstan-fın iskerlik baılanystarynyń kókjıegin keńeıte túspek.
– Bul kelisim Qazaqstan-Fınlıandııa kásipkerleriniń «bir tereze» qaǵıdaty boıynsha baılanysýyna múmkindik ashady. Sonyń nátıjesinde, álemde ınnovasııalyq jańashyldyqtary, tyń oılary arqyly oıyp turyp oryn alatyn Fınlıandııa bıznes ókilderimen saýda-ekonomıkalyq baılanystar nyǵaıa túspek, – dedi kelissózder qorytyndysy boıynsha suhbat bergen M.Pishembaev.
Esterińizge sala ketsek, Memleket basshysy Nursultan Nazarbaev resmı saparmen Fınlıandııa Respýblıkasyna keldi.
Sapar aıasynda Nursultan Nazarbaevtyń Fınlıandııa Respýblıkasynyń Prezıdenti Saýlı Nıınıstıomen shaǵyn jáne keńeıtilgen quramdaǵy kezdesýi, sondaı-aq Fınlıandııanyń isker toptar ókilderimen kezdesýi josparlanyp otyr.
Serik ÁBDIBEK,
«Egemen Qazaqstan» – Helsınkı (Fınlıandııa)