Sapar aıasynda Nursultan Nazarbaevtyń Fınlıandııa Respýblıkasynyń Prezıdenti Saýlı Nıınıstıomen shaǵyn jáne keńeıtilgen quramdaǵy kezdesýi, sondaı-aq Fınlıandııanyń isker toptar ókilderimen kezdesýi josparlanyp otyr.
Búginde Qazaqstan-Fınlıandııa qarym-qatynastary joǵarǵy deńgeıge shyǵyp, eki memleket halyqaralyq jáne óńirlik mańyzdy máseleler boıynsha bir-birine belsendi qoldaý kórsetip otyrǵan senimdi seriktes jáne saıası áriptes bolyp esepteledi.
Qazaqstan úshin Fınlıandııa ótken 26 jyl ishinde Soltústik Eýropa men Eýroodaqtaǵy kóptegen máseleler boıynsha kózqarasy men ustanymy sáıkes keletin tuǵyrly memleketterdiń birine aınaldy.
Atap aıtqanda, Qazaqstan men Fınlıandııanyń syrtqy saýda aınalymy 2017 jyly 307,9 mln AQSh dollaryn qurady.
2018 jyldyń qańtar-shilde aılarynda saýda aınalymy 160 mln AQSh dollaryna jetken. Sońǵy 13 jylda (2005 jyldan 2018 jyldyń 1 toqsanynda) Qazaqstanǵa Fınlıandııadan tartylǵan tikeleı ınvestısııa kólemi 334 mln AQSh dollaryn qurady. Búginde Qazaqstanda fın kapıtalynyń úlesi bar elýden asa kásiporyn jumys istep tur.
Qazaqstan-Fınlıandııa saýda-ekonomıkalyq qarym-qatynastarynyń negizin hımııa, jeńil ónerkásip, taý-ken-metallýrgııa kesheni, qurylys materıaldaryn shyǵarý, joǵary tehnologııalyq syr óndirisindegi baılanystar quraıdy.
Memleket basshysy Nursultan Nazarbaevtyń Fınlıandııa Respýblıkasyna sapary eki kúnge josparlanǵan.
Buǵan deıin Qazaqstan Prezıdenti Fınlıandııaǵa 2009 jyly memlekettik saparmen kelgen.
Serik ÁBDIBEK,
«Egemen Qazaqstan» – Helsınkı (Fınlıandııa)