Aqtóbe saıabaqtar men gúlzarlar qalasyna aınalyp keledi. Tek sońǵy úsh jyldyń ishinde munda 50-ge tarta mándi de sándi demalys oryndary boı túzepti. Taıaýda bulardyń qatary qaıtalanbas keskin-kelbeti men naqyshy bar taǵy bir aıyryqsha da ajarly saıabaqpen tolyqty. Sheber qoldar men shyǵarmashylyq ushqyr oıdyń izi atoılap turǵan saıabaqqa «Astana» ataýy berilgen.
Nysandy qarjylandyrý isi «Paryz» jáne Astana qalasy qorlary esebinen júrgizilgen. Mundaǵy qurylys-montaj jumystarynyń jalpy quny 466 mıllıon tenge quraıdy. Búgingi alańy nebári 4,3 gektardy quraıtyn «Astana» aldaǵy jyldarda 90 gektar kólemdi qamtıtyn sheti men shegi joq úlken saıabaqqa aınalmaq.
Soǵaı sáıkes onyń aınalasyn abattandyrý isi odan ári jalǵasa bermek. Jańadan jasaqtalǵan saıabaqta Elordasy Astanany qaq jaryp aǵatyn Esil ózeniniń móltek maketi men bas qaladaǵy negizgi nysandardyń shaǵyn nobaıy kórinis taýypty. Buǵan qosa bul arada ár túrli arhıtektrýalyq ansamblder, shaǵyn júrginshiler men velosıped joldary salynbaq. Sondaı-aq osy mańdaǵy neke saraıy men óner ortalyǵynyń artynan úlken etnoaýyl boı túzemek.
Qysqasy Astananyń ataýyn alǵan demalys ornynda onyń elimizdiń elordasyna arnalǵanyn aıǵaqtaıtyn aıshyqtar jetkilikti. Saıabaqta Astananyń túrli-tústi panaramalyq kórkem kórinisteri beınelengen. Nur sáýlesi shashyraǵan aqyq shamdar men yńǵaıly oryndyqtar, músindik tulǵalar men relefti tóbeler eshkimdi de enjar, selsoq qaldyra almaıdy. Esil ózeniniń jaǵalaıyn eske salatyn eni 3,5 metr, tereńdigi 50 sm aryqtar syldyr qaǵyp, tynyǵýǵa kelgen qala turǵyndary men qonaqtaryna umtylmastaı áser ári jaıly kóńil-kúı syılar alary anyq. Shaǵyn jasandy ózen ústine kópirler salynǵan. Bul sáýlettik úlgiler e saıabaqty tartymdy da, áserli kórinistermen tolyqtyrý nıetinen týǵan shynaıy shyǵarmashylyq sheshim ekenin eriksiz túısinesiz.
Qanatyn keńge jaıylyp, irgeń bekı tússin «Astana» saıabaǵy!
Temir Qusaıyn,
«Egemen Qazaqstan»
AQTО́BE