Sońǵy kezderi ókildi organdar sybaılas jemqorlyqqa qarsy tıimdi sharalar jasap keledi. Biraq osy qatarda keıbir olqylyqtardyń áli de oryn alyp, bul baǵyttaǵy sharalar qoǵamdy tolyq qanaǵattandyrmaı kele jatqanyn aıtýǵa tıispiz.
Bizge Astana qalasyndaǵy birqatar úleskerlerden hat keldi. Onda úleskerler ózderine jaýap berýge tıisti «Nomad stroı EK» JShS laýazymdy adamdarynyń jaýapkershilikten qashyp otyrǵanyn aıtady. Olar «Esil EK» TQK jáne «Future home» turǵyn úılerine salynǵan aqshalaryn jymqyrdy dep aıyptalýda. Osy iste úleskerler birneshe jyldan beri ádildikke qol jetkize almaı keledi eken. Jábirlenýshiler mundaı keleńsizdikke memlekettik organdardyń jáne qalyń kópshiliktiń kóz aldynda jol berilip jatqanyna qynjylady.
Úleskerler ózderiniń qurylysqa arnaǵan qarajattaryn «Astana fınans holdıng» mıkroqarjylyq uıymy arqyly qolma-qol aqshamen jáne nesıe retinde salǵanyn aıtady. Al osy qarjylyq uıymdy «Nomad stroı EK» JShS basshylary ashqan eken.
Aqshalaryn qaıtara almaı, úılerin de ala almaı pushaıman bolǵan turǵyndar ózderiniń hatynda sottyń sheshimderine, sot oryndaýshylary men salyq organdarynyń kóptegen tyıymdaryna, banktegi shottardyń 20 retten artyq tutqyndalǵanyna qaramastan, Astananyń qurylys basqarmasy atalmysh JShS basshylaryn memlekettik baǵdarlamaǵa sáıkes salynatyn áleýmettik nysandar turǵyzý qurylysynyń memlekettik satyp alýlaryna qatystyryp, jeńimpaz dep tanyǵanyn aıtady. Onyń ústine sot 2015 jyldyń sáýir aıyndaǵy sheshimimen bul uıymdy senimsiz qatysýshy dep te sheshim shyǵarǵan eken. Al olardyń qaǵanaǵy qarq, saǵanaǵy sarq. Memlekettik satyp alý boıynsha jeńip alǵan bir qurylys sharty boıynsha ǵana memlekettik bıýdjetten qarjylandyrýdy 1,8 mlrd teńgege arttyryp, qurylys merzimin jalǵastyryp alǵan. Alaıda kóppáterli úılerdiń qurylysyn aıaqtamaǵan. Tipti basshylary sottalǵannan keıin de tenderge qatysyp, 1 mlrd teńgeniń qurylysyn salý tapsyrmasyn jeńip alǵan...
Qoryta aıtqanda, «Nomad stroı EK» JShS memleketke jáne jeke azamattarǵa 7 mlrd teńgeden artyq zııan keltirgen. Munyń ishinde tólenbegen eńbekaqy jáne kredıtorlyq qaryzdar joq. Olardy qossaq bul fırmanyń zııankestigi shekten shyǵyp ketedi. Osynyń ózi Astana qalasynda anyqtalǵan faktiler. Al bular basqa aımaqtarda da jumys istep, halyqty qan qaqsatýy múmkin. Úleskerler óz hatynda Astana qalasynyń Saryarqa aýdandyq prokýratýrasyna qaıyrylǵandarymen eshqandaı nátıje bolmaǵanyn aıtady.
Mine, osyndaı zańsyzdyqtardy kórgen soń biz tıisti organdarǵa qaıyrylyp, tekserýdi talap etken hattar jiberdik.
Turǵyn SYZDYQOV,
Májilis depýtaty