Bıylǵy tamyz aıynda bolyp ótken Kaspıı sammıtinde Prezıdent N.Nazarbaev elimizdiń týrızmin damytatyn teńizimiz bar, ol Túrkııanyń Antalııasynan kem emes deı kele, osy salany birlesip órkendetýdi usyndy.
Aıtylǵan tapsyrma Kaspıı teńizin týrıstik maqsatta qoldanýǵa kóp kúsh salyp, ınfraqurylym men qyzmet kórsetý sapasyn jaqsartýdy qajet etedi.
Búgingi tańda Mańǵystaý oblysynyń jaǵalaý aımaǵy – 900 shaqyrym. Onyń basym bóligin týrıstik aımaq, ıaǵnı sýǵa túsý, qaıyqtarmen serýendeý, áýesqoılyqpen balyq aýlaý úshin paıdalanýǵa bolatyn jer quraıdy. Qoldanystaǵy zańǵa sáıkes shekara qyzmeti jergilikti atqarýshy organdar men uıymdardyń kelisilgen usynymdaryna saı, jyl saıyn eki mılge deıingi araqashyqtyqta tulǵalardyń demalys, týrızm jáne sport maqsatynda paıdalanatyn shaǵyn kólemdi kemeleriniń júzýi úshin Kaspıı teńiziniń jaǵalaý ýchaskeleriniń tizbesin belgilep, rejimdik shekteýlerdiń qoldanysyn toqtatady.
2018 jylǵy shilde aıynda depýtattardyń Mańǵystaý óńirine sapary kezinde saılaýshylar atalǵan salany damytýǵa kedergi keltirip otyrǵan birqatar máselelerdi kóterdi. Sonyń qatarynda teńizge serýendeýge shyǵatyn týrıster tizimin memlekettik organmen kelisý prosedýrasy birshama uzaqqa sozylyp ketetini aıtyldy. Osyǵan baılanysty biz shaǵyn kólemdi kemeleri bar azamattarǵa belgilengen ýchaskelerde mindetti ruqsattamalar alý rásimderiniń satylaryn qysqartyp, jeńildetý úshin ony Halyqqa qyzmet kórsetý ortalyqtary arqyly berýdi usynamyz.
Sondaı-aq teńizdegi faýnanyń damýyna kedergi keltiretin quqyq buzýshylyqtardyń aldyn alý úshin normatıvtik-quqyqtyq aktilerdi jetildirý kerek. Máselen, týrıst atyn jamylyp, zańsyz brakonerlikpen aınalysatyn azamattardyń derekter bazasyn jasaý arqyly olardyń teńizge qaıtadan shyǵýyna ruqsat bermegen durys. Buǵan qosa «Baıda» tıpindegi kishigirim kemelerdi tirkeýge, kommersııalyq shaǵyn keme qozǵaltqyshtarynyń jalpy qýatyn shekteýge tyıym salýdy qolǵa alý kerek.
«Qazaqstan Respýblıkasynyń memlekettik shekarasy týraly» zańǵa sáıkes qazaqstandyq shaǵyn kólemdi kemelerdiń teńizge shyǵýy men qaıta oralýyn esepke alýdy retteý úshin prıstandar men aılaqtardy kerekti jabdyqtarmen jaraqtandyrǵan jón.
Kaspıı teńiziniń qazaqstandyq akvatorııasynda tótenshe jaǵdaılardyń jappaı aldyn alý úshin tıisti ýákiletti organdarǵa barlyq sýda júze alatyn tehnıkalardy tirkep, olardyń sıpattamasyn eskerip, júzý shamasyn tekserýdi usynǵan durys.
Aldyńǵy qatarly sheteldik tájirıbeni zertteı kele, Kaspııdiń jaǵasyn abattandyrýmen týrıstik ınfraqurylymdy jaqsartý jóninde arnaıy baǵdarlama jasalǵany da durys bolar edi.
Asylbek SMAǴULOV,
Májilis depýtaty