Elimizde Elbasy N.Á.Nazarbaevtyń Jarlyǵymen «Qazaqstannyń Eńbek Eri» ataǵynyń taǵaıyndalǵanyna bıyl 10 jyl tolady. Osy jyldary kez kelgen eńbek adamy úshin respýblıkamyzdaǵy eń mártebeli ataq 23 eren tulǵaǵa berilgen eken. Alǵashqy qurmet ustaz A.T.Mırazovaǵa kórsetildi, bul shyn mánindegi ádil de zańdy tańdaý bolatyn.
Al marapattalǵandarǵa keler bolsaq, olardyń qaı-qaısysy da kópke tanymal qaıratkerler. Barlyǵynyń aty-jónin atap shyǵý biraz oryn alar edi, sol sebepti qysqasha ǵana toqtalaıyq. Máselen, «Rodına» agrofırmasy» JShS-niń bas dırektory I.Saýerdi, munaı-gaz óndirý salasynyń ardageri U.Qarabalındi nemese kardıohırýrg Iý.Pıany bilmeıtin jan kemde-kem. Ádebıet pen óner jáne sport salalary da nazardan tys qalmapty: Á.Kekilbaev, O.Súleımenov, A.Musahodjaeva, Iý.Pomeransev, A.Áshimov, J.Úshkempirov jáne taǵy basqalary.
Joǵary mártebeli ataqqa laıyq dep tanylǵandardyń ishinde agrarlyq sektordyń ókilderi basymdaý eken (9 adam), ónerkásip salasynan bes adam (ishinde bolat balqytýshy da bar) ozyp shyqqan, mádenıet ókilderi tórteý, dáriger ekeý. Bylaı alyp qaraǵanda, óndiris salasy, sóz joq, birshama qamtylǵan. Degenmen de, keıbir salalardyń ókilderi joqtyń qasy. Mysalǵa, temir joldy alaıyqshy. Barshamyzǵa belgili, Elbasy bul salany Qazaqstan ekonomıkasynyń qalyptasýyndaǵy, memleket táýelsizdigin, eldiń aýmaqtyq tutastyǵyn jáne áleýmettik turaqtylyǵyn nyǵaıtýdaǵy rólin joǵary baǵalaıdy. Atqarylǵan ıgi ister de barshylyq. Elimiz táýelsizdik alǵan soń temir joldyń ońtaıly ulttyq jelisin qurý qolǵa alyndy, óıtkeni keıbir óńirler men oblystar arasyndaǵy kólik baılanysy kórshi memlekettiń ýchaskeleri boıynsha júzege asyrylatyn. Jańa jelilerdiń iske qosylýy óńirler arasyndaǵy ishki kommýnıkasııalardy, Qazaqstannyń tranzıttik jáne eksporttyq áleýetiniń ósýin qamtamasyz etti. Qazirgi ýaqytta Qazaqstanda 5 halyqaralyq temir jol kólik dálizi jumys isteıdi.Tamasha jetistik! Sol ıgi isterdi atqarýshylar kim? Árıne, temirjolshylar, qurylysshylar!
Meniń paıymdaýymsha, qarapaıym jol brıgadıri, toǵyz joldyń torabynan shyqqan qandyaǵashtyq Moldash Jańabergenovtan soń (o da Odaq kezinde bolǵan jaǵdaı) birde-bir temirjolshy mundaı joǵary ataqqa usynylmaǵan eken. Laıyqty adamdar joq emes, bar ǵoı! Basqasyn aıtpaǵanda, táýelsizdik jyldary zamana talabyna saı temir jol qurylysyn júrgizýdi jetik meńgergen otandyq kásipqoı menedjerler toby qalyptasty. Solardyń ishinen Borıs Aleksandrovıch Isınamanovty aıryqsha atar edim. Jalpy bul azamattyń esimi Qazaqstan temirjolshylaryna jaqsy tanys. Ol bul tyń salaǵa mol tájirıbe jınaqtap baryp keldi. Kezinde Batys Qazaqstan temir joly bastyǵynyń orynbasary, Aqtóbe temir jol bólimshesiniń bastyǵy bolyp qyzmet etken. Temir jol salý jóninde jańa joba qolǵa alynsa boldy, ınvestorlar Borıs Aleksandrovıchtiń kómegine júginedi. О́ıtkeni ol biliktiligi men basqarýshylyq qabiletiniń arqasynda kez kelgen qıyndyqty jeńýge ázir, óte senimdi adam.
Qoryta aıtqanda, Borıs Aleksandrovıch Isınamanov tájirıbeli jolshy-ınjener, isker uıymdastyrýshy retinde Qazaqstan temir jolyndaǵy jańa jol qurylystarynyń kópshiligine jetekshilik etti, olardyń uzyn sany mynalar: Hromtaý – Altynsarın – 404,5 km, Jetigen – Altynkól – 235,0 km, Arqalyq – Shubarkól – 225,0 km, Almaty-1 – Shý (ekinshi joldar) – 100 km, Jezqazǵan – Sekseýil – 494,5 km.
B.Isınamanovtyń basshylyǵymen salynǵan jańa temir joldardyń jalpy uzyndyǵy 1460 shaqyrymdy quraıdy, al bul bir temir jol bólimshesiniń joldaryna para-par.
Borıs Aleksandrovıch áli kúnge deıin eńbekten qol úzgen emes, áli de tyń, qaıratty – 2017 jyldyń shilde aıynan bastap «Dosjan temirjoly» AQ prezıdentiniń keńesshisi bolyp jumys isteıdi. Qara jumysshydan bastap eńbekte quryshtaı shyńdalǵan ardager. О́z isine berilgen mundaı bolat jol baǵbandary Qazaqstan temir jolynda kóptep sanalady.
Naǵashybaı BALMAHANULY,
jýrnalıst
Aqtóbe