Taraz tarıhpen tamyrlasqan, shejiremen kómkerilgen aıshyqty qalanyń biri. Kún ótken saıyn túrlenip kele jatqan kóne shahardyń qala kúni qarsańynda totydaı taranýy da zańdylyq.
Bul kúni qala kóleminde kóptegen nysandar ashylyp, el ıgiligine berildi. Solardyń biri – Jeltoqsan kóshesiniń boıynan ashylǵan «Jeltoqsan tolqyny» sýburqaǵy. Aıta keteıik, bul elimizdegi eń uzyn sýburqaq bolyp sanalady.
Búgin Taraz tórinen ashylyp otyrǵan «Jeltoqsan tolqyny» sýburqaǵynyń uzyndyǵy 220 metr. Al qala sáýletin arttyrǵan bul sýburqaqtyń alǵashqy tolqyny 86 sanynan bastalady. Sýburqaqtyń eki jaǵynda pyraqtyń, barystyń jáne samuryqtyń músinderi bar. Sáýlet ónerine tán erekshelikti saqtaı otyryp salynǵan sýburqaqtyń ashylý saltanatyna da tarazdyqtar kóptep jınaldy. Kópshilik tolqyndar sýburqaqtyń sońyna jetip, keri qaıtqanda Táýelsizdiktiń aıshyǵy kún men búrkitti beıneleıtin beınesine aınalyp, odan ári Egemendikke ulasatyn ereksheligin tamashalady. Aq mármár tastan jasalǵan sýburqaq kelýshilerdiń qyzyǵýshylyǵyn týdyrdy.
Bul oraıda balalar alańshasynda merekelik konsert ótip, qalanyń damýyna úles qosqan birqatar azamattar marapattaldy. О́z kezeginde «Palaý festıvali», óńirdegi etnomádenı ortalyqtardyń kórmesi men jármeńkesi ótti.
Hamıt ESAMAN,
«Egemen Qazaqstan»
Jambyl oblysy