Amandyq Batalov bastaǵan Almaty oblysynyń delegasııasy Qostanaı oblysynda boldy. Delegasııa aldymen Qostanaıdyń sońǵy jyldardaǵy jetistikteri – Indýstrııalyq aımaqty, «Baıan sulý» kondıter farıkasynyń jańǵyrtylǵan sehtaryn, «SaryarqaAvtoProm» mashına jasaý zaýytyn jáne berneshe sport nysandaryn aralap kórdi.
Oblys ákimi Arhımed Muhambetov Qostanaı men Almaty oblysy arasyndaǵy ekonomıkalyq baılanys keńeıip kele jatqandyǵyn atap ótti. Mysaly, ótken jyly Almatyǵa 9 mıllıard teńgeden astam somanyń ónimi jiberildi. Bul burnaǵy jylmen salystyrǵanda 14 prosentke kóp. Sondaı-aq, almatylyq bıznes ókilderiniń Qostanaıǵa jibergen ónimi de osy qaralas bolady.
Arhımed Muhambetov yntymaqtasyp otyrǵan eki oblysta shekaralyq óńir ekenin atap aıtty. Almaty oblysy Qytaımen, Qostanaı Reseımen shektesedi. Munyń ózi eki oblystyń da naryǵyn keńeıte túsedi. Bul qos oblystyń memorandým boıynsha eki jaqty ınvestısııa salýyna qolaılylyq týǵyzady. Arhımed Begejanuly Reseıge ınvestısııa salatyn almatylyq kásipkerlerge Qostanaıda ókildigin ashýyna usynys jasady. Qostanaı oblysynyń almatylyqtarǵa suranysyna qaraı usynary da jetkilikti.
«Biz ózimizde qurastyrylyp jatqan tehnıka túrlerin, naqtyraq aıtsaq, traktorlar, kombaındar jáne basqa da aýyl sharýashylyǵy tehnıkalaryn bere alamyz. Osy jyly qýatty zamanaýı sement zaýyty iske qosylady, sizderge Qytaımen shekaradaǵy jańadan salynyp jatqan Nurkent qalasynyń qurylysy úshin onyń ónimin artýǵa da bolady» dedi oblys ákimi Arhımed Muhambetov. Sonymen qatar oblys ákimi Almatynyń ásem tabıǵaty, kórikti jerlerine qostanaılyqtardy demalýǵa, ásirese, jumysshylar men bıýdjet salasynyń qyzmetkerlerin jiberýge bolatynyn aıtty.
Al Almaty oblysynyń ákimi Amandyq Batalov óziniń týǵan jeri Qostanaı oblysyna kelgenine, ásirese, onyń kórkeıgenin, óskenin kórip qýanǵanyn jasyrmady. Almatylyq delegasııa Qostanaı qalasyndaǵy memleket-jekemenshik áriptestigimen salynǵan qurylystar, qalany kórkeıtý jumystarynan ozyq tájirıbe de alýdy uıǵardy.
Árıne, megopolıs Almaty qalasy turǵan oblysty Qostanaı oblysymen salystyrýǵa bolmas. Olarda 6 ındýstrıalyq aımaq bar, al Qostanaıda bireýi endi salynyp jatyr. Biraq Amandyq Batalov ınvestısııa tartý jaǵynan Qostanaı oblysynyń alǵa ketkenin moıyndady. Qostanaıdaǵy Indýstrııalyq aımaqtyń ınvestorlar úshin sonshalyqty qolaıly etip salynyp jatqanyna joǵary baǵa berdi.
Almatylyq áriptester qostanaılyq ınvestorlarǵa jer telmin berýge ýáde etti. Onda «Baıan sulý» kondıter fabrıkasynyń saýda pavılony salynatyn bolady. Demek «Baıan sulýdyń» kondıterlik ónimi Qazaqstannyń ońtústik aımaǵyna shyǵarylýy úshin múmkindik týatyn bolady. Batalov sonymen qatar qostanaılyq kondıter fabrıkasy úshin qantty da sol jerdegi zaýyttan berýge ýáde etti. Almatylyqtar qant qyzylshasynyń alqaptaryn keńeıtip jatyr. Onda Qostanaıda qurastyrylǵan «Belorýs» traktoryn paıdalanatyn bolady. Qos oblystyń ákimderi yntymaqtastyq jónindegi memorandýmǵa qol qoıdy. Onda kórsetilgen negizgi jumys baǵyttaryn naqtylaı túsý úshin eki oblys ákimderiniń orynbasarlaryna tapsyrma berildi.
Názıra Járimbet,
«Egemen Qazaqstan»
Qostanaı