Mınskide resmı saparda júrgen Qazaqstan Parlamenti Senatynyń Tóraǵasy Qasym-Jomart Toqaev Belarýstiń Ulttyq jınalysy Respýblıka Keńesiniń Tóraǵasy Mıhaıl Mıasnıkovıchpen kelissóz júrgizdi, dep habarlaıdy Senattyń baspasóz qyzmeti.
Júzdesýshiler eki memlekettiń zań shyǵarý organdary yntymaqtastyǵynyń jaı-kúıi men keleshegin talqylady.
Q.Toqaev Qazaqstan Prezıdenti N.Nazarbaevtyń taıaýdaǵy Joldaýynyń negizgi baǵyttaryn, ondaǵy bizdiń azamattarymyzdyń ál-aýqatyn arttyrý men ekonomıkanyń ornyqty ósýin qamtamasyz etý jónindegi birinshi kezektegi mindetterdi sheshý maqsattary kózdelgeni týraly belarýs tarapyn habardar etti.
TMD, UQShU jáne EQYU-nyń parlamentaralyq birlestikterin parlamenttik dıplomatııadaǵy negizgi baǵyttar retinde ataǵan Q.Toqaev bizdiń elderimiz osy halyqaralyq uıymdardyń aıasynda kúsh-jigerdi úılestirip ári bir-birine ózara qoldaý kórsetip otyrǵanyn atap ótti.
Qazaqstan delegasııasy basshysynyń pikirinshe, bizdiń memleketterimizdiń kóptarapty baılanystaryna parlamentshiler qosymsha serpin bere alady.
Kelissóz barysynda eki memlekettiń ınvestısııalyq jáne ǵylymı-tehnıkalyq yntymaqtastyǵyn damytýǵa basa nazar aýdaryldy.
M.Mıasnıkovıch ekijaqty taýar aınalymyn 1 mıllıard dollarǵa deıin jetkizý jáne eki eldiń ekonomıkalyq, saýda jáne ǵylymı-tehnıkalyq yntymaqtastyǵyn belsendi júrgizý, stýdentter almasýyn damytý, týrıstik saıahattardy damytý qajettigi týraly aıtty. Respýblıka Keńesiniń Tóraǵasy qazirgi kezde Qazaqstan belsendi túrde qatysyp jatqan qytaılyq «Bir beldeý, bir jol» strategııasyn iske asyrý aıasynda Belarýstiń kólik-logıstıkalyq áleýetin paıdalaný mańyzdy ekenin atap ótti. Atap aıtqanda, Belarýs arqyly ótetin jáne Qytaıdy Eýropa Odaǵy elderimen baılanystyratyn transqurylyqtyq baǵdardyń jańa soltústik tarmaǵyn damytýǵa Mınsk múddeli bolyp otyr.
Q.Toqaev atap ótkendeı, «Bir beldeý, bir jol» strategııasy Qazaqstansyz júzege aspaıdy. QHR Tóraǵasy Sı Szınpın jahandyq geosaıasatty ózgerte alatyn óz strategııasyn alǵash ret Astanada jarııa etken bolatyn. 2020 jylǵa deıin Qazaqstan jylyna tranzıtten túsetin kiristi 5 mıllıard dollarǵa deıin jetkizý týraly maqsat qoıýy da bizdiń elimizdiń mańyzdy rólin kórsetip otyr.
Senat Tóraǵasy belarýstyq áriptesin Qazaqstanǵa resmı saparmen kelýge shaqyrdy.
Qazaqstan parlamenttik delegasııasynyń basshysy Belarýs Ulttyq jınalysy О́kilder palatasynyń Tóraǵasy Vladımır Andreıchenkomen de kezdesti. Kezdesýge qatysýshylar Qazaqstan men Belarýs qatynastarynyń damý qarqynyn, parlamentaralyq únqatysý onyń mańyzdy bóligi ekenin atap ótti. Q. Toqaev Qazaqstan saıası júıesindegi Senattyń orny týraly habardar etip, Memleket basshysy N.Nazarbaevtyń bastamasymen júzege asqan saıası jáne áleýmettik-ekonomıkalyq reformalardy Palata depýtattarynyń zańnamalyq turǵyda qoldaýy mańyzdy ekenin aıtty.
Senat Tóraǵasy Jeńis eskertkishindegi máńgilik alaýǵa gúl qoıdy jáne Belarýs memlekettik Uly Otan soǵysynyń tarıhy murajaıynda boldy.