Elimizdegi «Biryńǵaı jınaqtaýshy zeınetaqy qory» aksıonerlik qoǵamynyń 2019 jylǵa arnalǵan komıssııalyq syıaqysy azaıtyldy. Bul týraly búgin «BJZQ» AQ baspasóz ortalyǵy málimdeme taratty.
Qazaqstan Respýblıkasy Ulttyq Bankiniń qaýlysymen «Biryńǵaı jınaqtaýshy zeınetaqy qory» aksıonerlik qoǵamynyń komıssııalyq syıaqysynyń 2019 jylǵa arnalǵan shamasy:
1) ınvestısııalyq tabys somasynyń 5,0 paıyzy;
2) zeınetaqy aktıvteriniń aıyna 0,015 paıyzy kóleminde bekitildi.
Osy arada eske sala ketý kerek, «Qazaqstan Respýblıkasynda zeınetaqymen qamsyzdandyrý týraly» QR Zańyna sáıkes Biryńǵaı jınaqtaýshy zeınetaqy qorynyń komıssııalyq syıaqysynyń shekti shamasy: ınvestısııalyq tabystyń 7,5 paıyzynan jáne zeınetaqy aktıvteriniń aıyna 0,025 paıyzynan aspaıtyn shekte belgilenedi.
Joǵaryda kórsetilgen shamalar 2014 jyldan beri talaı ret azaıtyldy jáne kórsetilgen shamalardan 2019 jylǵa qaraı:
– ınvestısııalyq tabys somasynan 33 paıyzǵa (2014 jyly – 7,5%);
– zeınetaqy aktıvterinen 40 paıyzǵa (2014 jyly – 0,025%) tómen.
Buǵan Qordyń bıznes-úderisterdi ońtaılandyrý, tıimsiz shyǵyndardy qysqartý, kórsetiletin qyzmetterdiń barlyq derlik túrin elektrondyq formatqa aýystyrý, kórsetilgen qyzmetterdiń jalpy kólemi ishinde olardyń úlesin arttyrýdy júrgizý nátıjesinde qol jetkizildi.
Aınash ESALI,
«Egemen Qazaqstan»
ALMATY