29 qazan – 2 qarasha kezeńinde «Qazaq Týrızm» Ulttyq kompanııasynyń Basqarma tóraǵasy Rashıd Kúzembaevtyń Shveısarııaǵa jumys sapary ótýde, dep habarlaıdy SIM baspasóz qyzmeti.
Sapardyń alǵashqy kúninde Jenevada Qazaqstannyń Shveısarııadaǵy Elshisi Janar Aıtjanova 30-dan astam týrıstik kompanııalar men áleýetti ınvestorlardyń qatysýymen «roýd-shoý» uıymdastyryldy. «Qazaq Týrızm» Ulttyq kompanııasy Qazaqstan jáne Respýblıkalyq týrısttendirý kartasy «ondyǵynyń» birqatar ınvestısııalyq jobalary týraly prezentasııa jasady.
30 qazanda Dúnıejúzilik ekonomıkalyq forýmnyń Týrızm men saıahattyń básekege qabilettigi jónindegi ındeksiniń ókilderimen kezdesý uıymdastyryldy. Atalǵan ındeks qurylyp jatqan Qazaqstannyń ishki jáne syrtqy týrızmin 2025 jylǵa deıin damytý jónindegi memlekettik baǵdarlamasy sheńberindegi mańyzdy kórsetkishterdiń birine aınalatyndyǵyn atap ótken jón.
Memleket basshysy N.Nazarbaevtyń Joldaýynda belgilengen Qazaqstanda týrızm ýnıversıtetin ashý týraly mindetti iske asyrý sheńberinde delegasııa týrızm salasyndaǵy mamandar men qyzmet kórsetý personalyn daıyndaıtyn «Ecole Hotelier Geneve» Qyzmet kórsetý mektebine bardy. Mektep basshylyǵy Qazaqstan úshin oqý baǵdarlamasyn daıyndaý men ýnıversıtetti ashýda qolǵabys kórsetýge qyzyǵýshylyq bildirdi.
Kezekti roýdshoý 31 qazanda Sıýrıh qalasynda syrtqy týrızmniń 20 mańyzdy oıynshylaryn, Sıýrıh kantonynyń áleýetti ınvestorlary men múddeli kompanııalaryn qamtydy.
1 qarashada delegasııa Shveısarııanyń Ekonomıkalyq máseleler jónindegi memlekettik hatshylyǵynyń (SECO), «Swiss Tourism», «Swiss Health», «Swiss Education Group» kompanııalarynyń jáne basqa uıymdardyń basshylyǵymen birqatar resmı kezdesýler ótkizdi.
Kelissózderdiń qorytyndysy boıynsha «Kazakh Tourism» jáne «Swiss Tourism» arasyndaǵy yntymaqtastyq týraly Memorandýmǵa qol qoıý rásimi ótti. Memorandýmǵa sáıkes, shveısarııalyq tarap Qazaqstannyń ulttyq parkteri men taýly aımaqtaryndaǵy jyl boıy qyzmet kórsetetin týrızmdi damytýǵa, taýly gıdter men shańǵy ınstrýktorlaryn daıarlaý standarttaryn engizýge qolǵabys kórsetetin bolady. Sondaı-aq, ekijaqty qujat týrıstik ónimderdi ilgeriletý úshin ózara qoldaý kórsetýdi, aqparat almasýdy jáne halyqaralyq yntymaqtastyqty tereńdetýdi kózdeıdi.
Swiss Tourism yqpaldasýymen «Qazaq Týrızm» UK» Lýganodaǵy 16-shy Halyqaralyq týrıstik kórmege qatysady jáne Sernezdegi Shveısarııanyń ulttyq parkin basqarý modelimen tanysady.