Memleket basshysy Investısııalar jáne damý mınıstri Jeńis Qasymbekti, «Samuryq-Qazyna» aksıonerlik qoǵamy dırektorlar keńesiniń múshesi Rıchard Evansty jáne «Eır Astana» áýe kompanııasynyń prezıdenti Pıter Fosterdi qabyldady dep habarlaıdy Aqordanyń baspasóz qyzmeti.
Kezdesý barysynda azamattyq avıasııany damytý máseleleri, sondaı-aq «Eır Astana» áýe kompanııasynyń qazirgi ahýaly men aldaǵy perspektıvalary talqylandy,
– «Eır Astana» – bizdiń negizgi áýe tasymaldaýshy kompanııamyz. Biz ony Rıchard Evanspen birlese qurdyq. Osy jyldar ishinde kóp jumys atqaryldy. Búginde kompanııa jaqsy qyrynan tanylyp, oń ımıdj qalyptastyrdy, – dedi Nursultan Nazarbaev.
Kezdesýge qatysýshylar Qazaqstan Prezıdentine álemdik áýe tasymaly naryǵyndaǵy sońǵy úrdister jóninde aıtty. Sonymen qatar, Nursultan Nazarbaevqa ushý qaýipsizdigin qamtamasyz etýge qatysty azamattyq avıasııany basqarýdyń brıtandyq modeliniń elementterin engizý maqsatymen atqarylyp jatqan jumystar jóninde baıandaldy.
Investısııalar jáne damý mınıstriniń málimetine sáıkes, 2018 jyly Qazaqstanda 13 baǵyt boıynsha áýe reısteri ashylyp, Astana qalasynda «ashyq aspan» pılottyq jobasy iske asyryldy.
Kezdesý sońynda Memleket basshysy áýe tasymaly qyzmetiniń halyqqa qol jetimdiligin arttyrýdyń mańyzdylyǵyn atap ótip, «Eır Astana» kompanııasynyń bazasynda tómendetilgen tarıf boıynsha kólik qyzmetin kórsetetin bıýdjettik áýe kompanııasyn qurýdy tapsyrdy.