Bıyl dıqandar 5 mıllıon 200 myń tonna astyq jınady. Sonymen qatar 258 myń tonna sút, 74 myń tonna et, 492 mıllıon dana jumyrtqa óndirildi. Kókónis pen kartop ta suranysqa jeterlik jınap alyndy. Bul úlken eńbektiń, jaqsy daıyndyqtyń, ozyq tehnologııalardyń qaıtarymy bolatyn.
«Bolashaq ónimniń negizi durys qalanǵanda tabysqa jetemiz. Tuqym tolyq kólemde sebildi. Par alqaptary tórt ret óńdeldi, 2 mıllıon gektardan asa súdiger jyrtyldy. Qolǵa qaraıtyn maldyń bir jarym jyldyq jem-azyǵy, súrlem, pishen jetkilikti daıyndaldy. О́tken jyldarmen salystyrǵanda tamaq jáne óńdeý kásiporyndary 1,5 mıllıard teńgege artyq ónim óndirdi», dedi jylǵa sholý jasaǵan oblys ákiminiń birinshi orynbasary Ǵaýez Nurmuhambetov.
Sońǵy jyldary mal sharýashylyǵyndaǵy oń ózgerister aıqyn bilinedi. Barlyq túliktiń sany artty, mal sharýashylyǵymen aınalysatyn agrofırmalardyń qarasy kóbeıip, olardyń sany 1294-ke jetti. Aýyl sharýashylyǵynyń ınvestorlarǵa tartymdylyǵy artty. Sońǵy jyldary oblys agroónerkásip keshenine salynǵan ınvestısııa 16 prosentke artyp, 32 mıllıard teńgeni qurady. Aýyl sharýashylyǵy tehnıkalaryn jańalaý qarqyny da jaqsardy.
Aýyl sharýashylyǵy alqaptaryn ártaraptandyrý isi jyldan jylǵa jyldamdata júrgizilip keledi. Qazir bıdaıdyń kólemi qysqaryp, ol barlyq alqaptyń 62 prosenti bolyp otyr. Sonyń arqasynda burshaq tuqymdastar 37, jem-azyq shóbi 18, maıly daqyldar 85 prosentke ulǵaıdy. Ǵaýez Torsanuly aýyl sharýashylyǵyn damytýda sıfrlandyrý baǵdarlamasynyń áseri mol bolǵanyn aıtyp ótti. Egin sharýashylyǵy men mal sharýashylyǵynda qatar júrgizilgen jumystar búginde oń nátıjesin kórsete bastady.
Aýyl sharýashylyǵy qyzmetkerleriniń kúnine arnalǵan saltanatty jıynda osyndaı jetistikter aıtylyp, ardagerler men ozattar «Eńbek ardageri» medalimen, «Aýyl sharýashylyq salasynyń úzdigi», «Qurmet ardageri» tósbelgilerimen jáne Aýyl sharýashylyǵy mınıstriniń «Qurmet gramotasymen» marapattaldy. Aýyl sharýashylyǵy qyzmetkerleri oblys kórkemónerpazdary men oblystyq fılarmonııasy óner sheberleriniń konsertin tamashalady.
Názıra JÁRIMBET,
«Egemen Qazaqstan»
Qostanaı