Oblys ortalyǵynda jylý-elektr ortalyǵynyń qurylysy qolǵa alynbaq. Bul týraly óńirlik kommýnıkasııalar qyzmetinde ótken brıfıngte aıtyldy.
Jobany «Dán» jaýapkershiligi shekteýli seriktestigi memlekettik-jekemenshik seriktestik sheńberinde qolǵa almaq. Jobany júzege asyrýǵa 4 ınvestısııalyq kompanııa tilek bildirgen. Tańdaý «Dán» seriktestigine túsipti.
Kompanııa basshysy Narıman Bıtakovtyń aıtýyna qaraǵanda, jylý-elektr ortalyǵynda saǵatyna 180 MVt elektr qýaty jáne 450 Gkal jylý qýaty óndiriletin bolady. Iske qosylǵan kezde turǵyn úıler men ónerkásip nysandaryn elektr qýaty, jylý jáne ystyq sýmen qamtamasyz etedi. Qurylys jumystary 2019 jyly bastalyp, 2023 jyly tolyq aıaqtalmaq.
– Oblys ortalyǵynda jylý-elektr ortalyǵyn salý týraly kelisimshart jasaý bizge Memleket basshysy alǵa qoıyp otyrǵan mindetti júzege asyrýǵa múmkindik beredi. Bul joba birinshiden, áleýmettik máselelerdi sheshýge septigin tıgizedi. Ortalyqta álemniń eń úzdik tehnologııasy qoldanylady. Osy jaı ekologııaǵa zııan tıgizbeı, tıimdilikti arttyrýǵa múmkindik beredi, – deıdi Narıman Bıtakov.
Qazirgi kezde jer telimi bólinip, barlyq tehnıkalyq sharttar jasalǵan. Ekologııalyq jáne sanıtarlyq-epıdemıologııalyq saraptama júrgizilip, qoǵamdyq tyńdaýlar ótkizilgen. Jylý-elektr ortalyǵyn jobalaý kezinde qazaqstandyq óndiris materıaldaryn molynan paıdalaný qarastyrylǵan.
Jylý-elektr ortalyǵy qatty otynmen ǵana emes, gazben de jumys isteıtin bolady. Paıdalaný kezinde jylyjaı kesheni men temir-beton buıymdaryn daıyndaıtyn zaýyt salý sııaqty qosymsha jobalardy da júzege asyrý josparlanýda.
Kompanııa basshylary bul jobany Slovenııanyń «Lýka ınjınırıng» kompanııasymen birlesip, ınvestısııa tartý arqyly júzege asyrmaq. Jobanyń quny shamamen 176 mıllıard teńge. Qurylys jumystary kezinde 700-900 adam, al, paıdalanýǵa berilgennen keıin 600 adam turaqty jumyspen qamtylady.
Baıqal BAIÁDIL,
«Egemen Qazaqstan»
Aqmola oblysy