Qazaqstan Respýblıkasy Mádenıet jáne sport mınıstrliginiń uıymdastyrýymen qazaq tili álipbıin latyn grafıkasyna kóshirý jumystary aıasynda 2018 jylǵy 14 qarasha saǵat 11.00-de (Astana ýaqyty boıynsha) respýblıka boıynsha latyn grafıkasy negizindegi «Jalpyhalyqtyq dıktant» ótti.
Mádenıet jáne sport mınıstrliginiń aqparaty boıynsha, respýblıkalyq aksııa elimizdiń barlyq óńirlerin qamtıdy jáne oǵan shamamen 2 mln qazaqstandyq qatysty. Dıktant bir ýaqytta respýblıka boıynsha óńirlerdegi tilderdi damytý basqarmalary daıyndaǵan arnaıy aýdıtorııalarda ótti.
Jalpyrespýblıkalyq aksııa jańa qazaq álipbıin nasıhattaýǵa, latynnegizdi qazaq álipbıin praktıkalyq turǵydan meńgerýge daǵdylandyrýǵa baǵyttalǵan.
Sharaǵa Qazaqstan Respýblıkasy Mádenıet jáne sport mınıstri Arystanbek Muhamedıuly qatysyp, jalpyhalyqtyq dıktant qatysýshylarǵa sáttilik tiledi.
- Qazaqstan Respýblıkasynyń Prezıdenti – Elbasy Nursultan Ábishuly Nazarbaevtyń qazaq tili álipbıin kırıllısadan latyn qarpine kóshirý týraly Jarlyqqa qol qoıǵanyn barsha halyq ystyq yqylaspen qabyldady. Bul elimizdegi erekshe mańyzdy sheshimderiniń biri boldy. Rýhanı jańǵyrý – bul tól ádebıetimizdi, mádenıetimizdi jańǵyrtý, ulttyq sanany oıatý. Álipbıdiń alǵashqy nusqasyna qoǵam arasyndaǵy talqylaýdan keıin ózgerister engizilip, 2018 jylǵy 19 aqpandaǵy №637 Jarlyǵymen jańa redaksııadaǵy álipbı nusqasy bekitildi. Jazýdy jańa álipbıge kóshirýdiń mádenı-áleýmettik, lıngvıstıkalyq, ekonomıkalyq, saıası, aqparattyq, pedagogıkalyq sebepteri bar. Osy oraıda, qazaq jazýyn latyn grafıkasyna kóshirý de mezgili jetken másele ekenin qazirgi Qazaqstan qoǵamynda bolyp jatqan talqylaýlar kórsetip otyr. Búgingi «Jalpyhalyqtyq dıktantty» uıymdastyrýdaǵy maqsatymyz - respýblıka turǵyndaryna jańa álipbıde tańba ǵana aýysatynyn, qazaq dybystary sol kúıinde qalatynyn túsindirý, jazý daǵdysyna beıimdelý. Dıktanttyń ereksheligi sol respýblıka boıynsha barlyq azamattardyń qatysý erkindiginde. Halyq praktıkalyq turǵyda sezingende ǵana aldymyzda turǵan qazaq álipbıin latyn grafıkasyna kóshirý jumystarynyń mańyzdylyǵyn túsinedi. Osy jalpyhalyqtyq sharaǵa bárimiz at salysyp, jańa tańbalarmen jazýymyzdy bastaıyq, - dedi ol.
Sonymen qatar Qazaqstan Respýblıkasy Mádenıet jáne sport mınıstrliginiń Jalpyhalyqtyq dıktantty ótkizý bastamasyn belgili qoǵam qaıratkerleri, jazýshylar, ǵalymdar, sportshylar, sonymen qatar mádenıet jáne óner salasynyń tulǵalary da qoldap otyr.
Qazaqstan Respýblıkasy Ulttyq akademııalyq kitaphanasynda dıktantqa belgili qoǵam qaıratkeri, aqyn-jazýshylar Roza Muqanova, Qonysbaı Ábilov, qazaqstandyq ártister Maıra Muhamedqyzy Turar Álipbaev, Nurbolat Arzamas, Baqtııar Adamjan, sportshylardan Serik Aqtaev, Aıbek Oralbaı, Áıgerim Ábilqadyrova jáne basqa da belgili mádenıet jáne óner qaıratkerleri qatysty.
Dıktanttyń taqyryby – «Rýhanı jańǵyrý» baǵdarlamasy. Mátin 80-ge jýyq sózden turady. Dıktant aıaqtalǵannan soń mátinniń jazbasha nusqasy emle.kz, tilalemi.kz saıttarynda jarııalanyp, ár qatysýshy óziniń jańa qazaq álipbıin meńgerý deńgeıin teksere alady.