Qazaqstan Respýblıkasynyń Premer-Mınıstri Baqytjan Saǵyntaev Jambyl oblysyna keldi. Úkimet basshysy óńirdegi jumys saparyn Taraz qalasyndaǵy «Kókjıek-2030» jaýapkershiligi shekteýli seriktestiginiń jumysymen tanysýdan bastady.
Sút ónimderin shyǵarýmen aınalysatyn kásiporyn Elbasy Joldaýyna sáıkes aǵymdaǵy jyly qaıta keńeıtilip qurylyp, modernızasııalanǵan. Italııanyń «FRAU IMPLANTI» kompanııasynyń jańa úlgidegi avtomattandyrylǵan jelidegi qural-jabdyqtarymen jasaqtalǵan. Joba quny 1,6 mıllıard teńge. Kásiporyn jetekshisi Ábdiǵalı Begimbetov Baqytjan Ábdirulyna ortalyqtyń táýligine 80 tonna sút óńdeýge qaýqarly ekendigin baıandady.
Baqytjan Saǵyntaev budan soń Taraz qalasynda qurylysy júrip jatqan №15 móltek aýdanyna atbasyn burdy. Búgingi tańda munda 80 páterli 10 kópqabatty turǵyn úı boı kóterýde. Olar «Nurly jer» jáne «7-20-25» memlekettik baǵdarlamalar sheńberinde salynýda. Jańa móltekaýdandaǵy qurylys jospary men memlekettik baǵdarlamalar aıasyndaǵy atqarylyp jatqan jumystar týraly Baqytjan Saǵyntaevqa oblys ákiminiń orynbasary Erkebulan Daýylbaev baıandap berdi. Onyń aıtýynsha, Elbasynyń «Bes áleýmettik bastamasynyń» birinshi baǵyty – «Árbir otbasyna baspana alýdyń jańa múmkindikterin berý» aıasynda óńirde birqatar jobalar iske asyrylýda. Taraz qalasyndaǵy qajetti ınfraqurylymmen qamtamasyz etilgen 462 gektar jer teliminde jańa eki móltek aýdandarynyń qurylysy júrýde. Atalǵan aýdandarda «7-20-25» baǵdarlamasy aıasynda usynylatyn 480 kóp qabatty jáne 969 jeke turǵyn úı qurylystary bastalyp, aǵymdaǵy jyly 10 kóppáterli úı (800 páter), 2019 jyly 25 úı (1 380 páter) paıdalanýǵa tapsyrylatyn bolady. Jalpy, Taraz qalasynda 686 páter baǵdarlama aıasynda azamattarǵa usyný úshin daıyn.
«7-20-25» kredıtteý baǵdarlamasy aıasynda ákimdik pen QR Ulttyq bankiniń fılıaly, baǵdarlamaǵa qatysýshy bankter arasynda birlesken is-qımyl jospary bekitilgen. «Qazaqstannyń turǵyn úı qurylys jınaq banki» fılıalynda búginde 44 648 salymshydan 10 mıllıard teńge jınalǵan. Ipotekalyq nesıeniń alǵashqy jarnasynyń 30 paıyzdan 20 paıyzǵa tómendeýine baılanysty, páter alýǵa múmkindigi bar azamattardyń sany 3 esege artty.
Premer-Mınıstrdiń barǵan kelesi nysany jylyna 2100 tonna ónim óndiretin «Sáýle» kondıterlik fabrıkasy boldy. Munda fabrıka basshysy Sáýle Janabekova zaýyttyń jumysy, tynys-tirshiligi týraly jan-jaqty málimetpen bólisti. Jobanyń jalpy somasy 1,2 mıllıard teńgeni quraǵan. Oblys ortalyǵynda ornalasqan kásiporyn jylyna 2160 tonna ónim óndirýge qaýqarly. Kásipker 2016-2017 jyldar aralyǵynda jabdyq satyp alýǵa jáne kommersııalyq jyljymaıtyn múlikti qaıta jańartyp, vaflı óndiretin jeli satyp alýǵa nesıe alǵan. Kondıterlik óndiris negizingen vaflı óniminiń túrlerin shyǵarýmen aınalysady.
Búgingi tańda fabrıkanyń joba quny 850,0 mıllıon teńge bolatyn ekinshi kezeńiniń qurylysy júrgizilýde. Joba iske qosylǵan kásiporynnyń tolyq jyldyq qýaty 4500 tonna bolady dep josparlanýda. Soǵan oraı taǵy jetpis adamdyq jumys orny ashylady dep kútilýde. Jobanyń ekinshi kezeńi osy jyldyń aıaǵynda paıdalanýǵa berilmek. «Bıznestiń jol kartasy – 2020» memlekettik baǵdarlamasy arqyly qomaqty qarjy nesıe alyp, jumysyn jandandyryp otyrǵan kásiporyn óńir ekonomıkasyn arttyrýǵa óz úlesin tıgizýde.
Budan keıin Premer-Mınıstrdiń qatysýymen Taraz qalasynan daryndy balalarǵa arnalǵan IT lıseı-ınternaty ashyldy. Bul bilim oshaǵy Elbasynyń tikeleı tapsyrmasymen qabyldanǵan «Sıfrlyq Qazaqstan» baǵdarlamasynyń sheńberinde iske qosyldy. Lıseı barlyq zamanaýı qurylǵylar jáne ozyq tehnologııalarmen qamtylǵan. Taraz qalasynyń jańa 14-shaǵyn aýdanynda ornalasqan lıseı ázirge 120 oryndy bolyp ashylǵanymen, 2019-2020 jyldary qurylys jumystary júrgizilip, 300 orynǵa keńeıtiledi dep josparlanýda.
Ornalasqan jer aýmaǵy 1,7 gektar. Bilim oshaǵy oqýshylarǵa IT tehnologııalar aıasynda qazaqsha, oryssha jáne aǵylshyn tilderinde bilim bermek. Oqý nysanynda 6 komplekt synyptary qamtylǵan. Tehnıkalyq-materıaldyq bazasyna keler bolsaq, lıseı kesheni 12 oqý kabıneti, 2 kompıýter kabıneti jáne kitaphana, LMK, medısınalyq kabınet, STEM-laboratorııa, robototehnıka, Web-baǵdarlamalar kabınetterimen jabdyqtalǵan. Sondaı-aq, sportzal, AKT zal men ashanasy bar.
О́ńirge jumys sapary barysynda Baqytjan Saǵyntaev Taraz qalalyq jumyspen qamtý ortalyǵynda bolyp, onda jumys baǵyttarymen tanysty. Oblys ákiminiń birinshi orynbasary Bekbolat Orynbekov óńirdegi jumyspen qamtý sharalarynyń júzege asýy, ózin-ózi jumyspen qamtyǵandar týraly jáne shaǵyn nesıe berý men osy oraıdaǵy kezdesip otyrǵan túıtkildi máselelerdi baıandap ótti.
Oblysqa jumys sapary barysynda Baqytjan Ábdiruly bıyl qaıta jańǵyrtylǵan Q.Rysqulbekov atyndaǵy saıabaq pen «Jeltoqsan» alleıasyna jáne Jambyl polıtehnıkalyq joǵarǵy kolledjine de keldi. Jambyl polıtehnıkalyq joǵarǵy kolledjine barǵan Premer-Mınıstr oqý ordasynyń materıaldyq-tehnıkalyq bazasymen tanysty. Kolledj 1560 orynǵa arnalǵan. Memlekettik jáne orys tilderinde bilim beretin bilim ordasynda 2 oqý, óndiris keshenderi, 420 oryndyq eki jataqhanasy, 74 oqý kabınetteri, 15 kompıýterlik klastar, 21 oqýsheberhanasy, 11 zerthanasy, 3 sport zaly, 2 sport alańshasy, kitaphana, oqý jáne akt zaldary bar. Munda barlyǵy 586 adam eńbek etedi. Onyń ishinde pedagogıkalyq quram 313 adam. Bul týraly oblystyq bilim basqarmasynyń basshysy Rahııa Turmahanbetova aıtyp berdi.
Aıta ketý kerek, atalmysh oqý ordasy osy jyldyń qyrkúıek aıynda Jambyl polıtehnıkalyq jáne Taraz hımııa-tehneologııalyq kolledjderiniń biriktirilýi aıasynda qaıta jasaqtalyp, óz jumysyn jalǵastyrýda. Elimizdegi sapaly ári bilikti mamandar daıarlaýda «Kásipqor» respýblıkalyq holdınginiń 10 jetekshi kolledjdiń qataryna engen. Atalǵan kolledjdiń oqý sheberhanasy foıesinde Premer-Mınıstr nazaryna «Sıfrly Qazaqstan» memlekettik baǵdarlamasynyń óńirdegi oryndalý jumystary barysy boıynsha ázirlengen prezentasııa usynyldy.
Jambyl óńirimizine issapary barysynda Premer-Mınıstr Baqytjan Saǵyntaev oblystyq balalar aýrýhanasyna, «Taraz sý» mekemelerine de arnaıy atbasyn burdy. Sondaı-aq, jambyldyq kásipkerlermen, bilim jáne densaýlyq saqtaý salasy qyzmetkerlerimen kezdesip, saladaǵy atqarylyp jatqan jumystar men jańashyldyqtar týraly oı bólisip, ózekti máselelerdi talqylady. «Sıfrly Qazaqstan» memlekettik baǵdarlamasy men tarıfterdi tómendetý boıynsha qolǵa alynǵan sharalar jaıynda jıyndar ótkizdi.
Hamıt Esaman,
«Egemen Qazaqstan»
Jambyl oblysy