Premer-Mınıstrdiń birinshi orynbasary Asqar Mamın Qaraǵandy oblysyna jasaǵan jumys sapary barysynda óńiraralyq «Kompanııanyń áleýmettik-eńbek saıasaty: tájirıbeleri men perspektıvalary» taqyrybyndaǵy semınar-keńeske qatysty.
Keńeske qatysqan oblys ákimi E.Qoshanov, Investısııalar jáne damý mınıstri J.Qasymbek, Eńbek jáne halyqty áleýmettik qorǵaý mınıstri M.Ábilqasymova sóz sóıledi. Sondaı-aq semınar-keńeske Astana qalasy ákiminiń, Soltústik Qazaqstan, Aqmola, Qostanaı, Pavlodar, Shyǵys Qazaqstan oblystary ákimderiniń áleýmettik áriptestikke jaýapty orynbasarlary, «Atameken» UKP, Kásipodaqtar federasııasynyń, 100-ge tarta iri otandyq kásiporyndardyń basshylary da keldi.
Keńeste óndiristik keshende jumys istep jatqan qazaqstandyq kompanııalardyń áleýmettik-eńbek saıasatyna jańa qadamdar ázirleýdiń mańyzy ataldy. «О́ndiristik sektordaǵy eńbek ónimdiliginiń ósimi jumys kúshiniń biliktiligi men jaǵdaıynyń jaqsarýymen anyqtalatyn faktorlarǵa baılanysty», deı kelip, A.Mamın osy oraıda «bul eń aldymen Memleket basshysy Joldaýda atap ketken negizgi element – adamı kapıtaldyń jıyntyǵy, jumysshylardyń áleýmettik jaǵdaıynyń jaqsarýy» degendi erekshe aıtty.
Memleket basshysynyń Joldaýy sheńberinde 2019 jyldyń qańtarynan eń tómengi aılyq jalaqy 1,5 esege ósedi. ERG, «Qazmyrysh» JShS, «Kazmıneralz», «Arselor Mıttal Temirtaý» sııaqty kompanııalar jáne ózgeleri de óz jumysshylarynyń jalaqysyn kóterý nıetinde.
Birinshi vıse-premer atap ketkendeı, Úkimet tarapynan eńbek daýlarynyń aldyn alý sapasyn arttyrý jónindegi sharalar qabyldanýda. Jumysshylar, jumys berýshiler jáne memleket arasyndaǵy únqatysýdyń qoljetimdiligi men sapasyn túbegeıli arttyrý jónindegi sharalar qarastyrylyp jatyr. «Jumysshylardyń eńbegin der kezinde tóleý men quqynyń saqtalýy kúsheıtiletin bolady», dedi A.Mamın osy oraıda.
TMK iri kompanııa jetekshileri keńes barysynda «áleýmettik jaýapkershilikti bızneste nátıjege jetýdiń eń basty tásili, barlyq basymdyqtardyń ıadrosy dep sanaıdy» degendi basa aıtyp ótti. «Bizdiń kásiporyndardyń áleýmettik baǵyty san qyrly jáne adamdardyń ómir sapasyn jaqsartýǵa baǵyttalǵan», dedi «Qazmyrysh» JShS turaqty damý jónindegi basqarýshy dırektory Andreı Lazarev.
О́ńirlerde kósheli kásiporyndar balalar baqshalaryn, medısınalyq mekemelerdi kúrdeli jóndeýden ótkizý, sport nysandaryn salý, olardy zamanaýı da dáldigi joǵary qural-jabdyqtarmen qamtý sııaqty áleýmettik jobalardy belsendi júzege asyrýda. Balalar úıine, kópbalaly otbasylarǵa, qarttar men múmkindigi shekteýli adamdarǵa qoldaý kórsetilip keledi.
Sonymen qatar ómirdiń barlyq salasyndaǵy sıfrlandyrý men jańa tehnologııalardyń qarqyndy damýy eńbek naryǵy men jumyspen qamtýǵa tikeleı yqpal etýde. Osyǵan baılanysty ekonomıkanyń jańa qajettilikterine eńbek resýrstarynyń beıimdelý mehanızmderi engiziledi. Eńbek resýrstary aǵynyn basqarý jónindegi sharalar ázirlenýde.
A.Mamın «Bul maqsattarǵa jetý úshin Úkimet Respýblıkalyq kásipodaqtar birlestigimen, Kásipkerlerdiń ulttyq palatasymen birlese 2018-2020 jyldarǵa arnalǵan Áleýmettik áriptestik jónindegi basty kelisim ázirledi», dedi. Qazirgi tańda jergilikti atqarýshy organdardyń kásiporyndarmen shamamen 700-ge tarta kompanııa jumysshylaryn qamtıtyn jol kartasy jasaldy. Qysqartýǵa túsken jumysshylardy qaıta daıarlaýǵa jáne olardyń ári qaraı jumysqa turyp ketýine birlese ınvestısııa salý qarastyrylyp otyr.
Jıyn barysynda qatysýshylar jumysshylarmen ujymdyq-kelisimdik qatynasqa kásipodaqtardyń qatysýy, korporatıvti áleýmettik jaýapkershilikti damytý máselelerine, eńbek qatynastaryn retteý jónindegi sharalarǵa nazar aýdardy. Sondaı-aq ken-metallýrgııa salasynda salalyq komıssııalar jumysy, ERG, «Qazaqmys» JShS, «QTJ» UK» AQ, «Qazmyrysh» JShS áleýmettik jaýapkershiligi tájirıbesi, «Arselor Mıttal Temirtaý» AQ áleýmettik turaqtylyqty qamtamasyz etý jónindegi qabyldap jatqan sharalary qaraldy.
Qaırat ÁBILDA,
«Egemen Qazaqstan»
QARAǴANDY