Elbasy Nursultan Nazarbaev pen Reseı Federasııasynyń Prezıdenti Vladımır Pýtınniń qatysýymen Petropavl qalasynda ótken HV óńiraralyq yntymaqtastyq forýmynyń aıasynda oblys ákimi Danıal Ahmetov Reseıdiń Altaı Respýblıkasynyń basshysy Aleksandr Berdnıkovpen eki aımaq arasynda birqatar saladaǵy áriptestikti nyǵaıtýǵa baǵyttalǵan memorandýmǵa qol qoıdy.
Atalǵan qujat Shyǵys Qazaqstan men Altaı Respýblıkasynyń saýda-ekonomıkalyq, mádenı-áleýmettik, aqparattyq, kóliktik, sondaı-aq aýylsharýashylyǵy salalaryndaǵy baılanysty jańa deńgeıge kóterýge múmkindik beredi. «Altaı – bizdiń ortaq úıimiz. Altaı tek Qazaqstan men Reseıdi ǵana emes, Mońǵolııa men Qytaıdy da biriktiredi. Bizdiń birlesken týrıstik baǵyttarymyz bar. Endi shekaradan kedergisiz ótý máselesin sheshkenimiz jón. «Rýhanı jańǵyrý» baǵdarlamasy aıasynda biz Abaı, Áýezov, Dostoevskıı, Shýkshın sekildi uly tulǵalardyń shyǵarmashylyǵyn nasıhattaıtyn, Qazaqstan men Reseıdiń ádebı, poetıkalyq jáne fılosofııalyq úndestigin kórsetetin birneshe marshrýt ázirledik», dedi D.Ahmetov jýrnalısterge bergen suhbatynda. Sondaı-aq aımaq basshysy búginde Shyǵysta emdeý-saýyqtyrý týrızmin damytýǵa baǵyttalǵan baǵdarlama ázirlenip jatqanyn, óńirde oqıǵaly týrızm salasyn qolǵa alý josparda bar ekenin jetkizdi.
О́z kezeginde Altaı Respýblıkasynyń basshysy reseılikter qazaqstandyqtarǵa týrızm salasynda jan-jaqty qyzmet túrlerin kórsetýge ázir ekenin aıtty. «Bizdiń qazaqstandyq áriptesterimizben baılanysymyz myǵym. Altaı − sizder úshin de, biz úshin de kıeli meken, qasterli uǵym. Kezinde dál osy Altaı jerinde Túrki qaǵanatynyń negizi qalanǵan eken. Sondyqtan bul túrkitildes ulttardyń qaı-qaısysy úshin de atajurt deýge bolady. Muztaý taýynyń bir jartysy Shyǵys Qazaqstan oblysyna qaraıdy. Demek, shyǵysqazaqstandyqtarmen múddemiz de, qundylyqtarymyz da bir. «Altaı – bizdiń ortaq úıimiz» halyqaralyq konstıtýsııalyq keńesiniń aıasynda «Altaı – altyn júzik» atty týrıstik joba ázirlendi. Tórt memleket aýmaǵyn qamtıtyn bul jobanyń qatysýshylary Qytaıdaǵy kóldi, Buqtyrma sý qoımasyn, Reseı aýmaǵyndaǵy Altaıdyń sulýlyǵyn tamashalaı alady», degen Aleksandr Berdnıkov shyǵysqazaqstandyq ınvestorlardy áriptestikke shaqyrdy.
Forým aıasynda uıymdastyrylǵan «Qazaqstan men Reseıdegi týrızmdi damytýdyń jańa təsilderi men úrdisteri» atty kórmede Shyǵys Qazaqstannyń týrıstik áleýeti, arheologııa salasy, týrızmniń emdeý-saýyqtyrý, ekologııalyq jáne basqa da túrleri, brendtik ónimderi tanystyryldy. Sonymen qatar Shyǵys Qazaqstan oblysynyń týrıstik aqparattyq ortalyǵy men Altaı aımaǵynyń týrıstik ortalyǵy aqparattyq yntymaqtastyq jónindegi memorandýmǵa qol qoıdy.
Azamat QASYM,
«Egemen Qazaqstan»
Shyǵys Qazaqstan oblysy