Qazaqstannyń Halyq aqyny Qalybekova Áselhan Álisherqyzynyń Shymkent qalasyndaǵy «Otyrar» ǵylymı-ámbebap kitaphanasynda «Jaýlyǵymnyń ushyna jupar túıdim» atty oqyrmandarmen kezdesý keshi ótti, dep habarlaıdy Otyrar aýdany ákiminiń baspasóz qyzmeti.
Poezııalyq keshke Otyrar aýdanynyń ákimi Aıtahanov Erlan Qýanyshuly qatysyp, aıtys súıer qaýymnyń ystyq yqylasyna bólene júrip qanshama jyr súleılerin shyńdap, aıtys dodasyna qanat qaqtyrǵan halyq aqynynyń halyq aldyndaǵy poezııalyq esep berý keshimen quttyqtady.
«О́zi de - óleń, ómiri de - óleń erge bergisiz qaısarlyq pen danalyqtyń ıesi, qazaqtyń Áselhany aıtystyń dińgegi berik aqbereni atansa, qulyndaı baptaǵan shákirtteri pyraqtaı top jaryp, qazaq ádebıeti men mádenıetine de aıryqsha úles qosyp keledi. Qara sózde - kıe bar. Qara sózde - júıe bar. Uıqaspen órilgen árbir óleń jolynda aqyn ananyń arqasyna arqalaǵany urpaqtyń ulaǵaty, uldyń ulyqty abyroıy, qyzdyń ómirlik tárbıesi ekeni birden ańǵarylady. Áli de daryn darabozdaryn baptap, dańqyn asqaqtata bererińizge senemiz. Ǵumyr jasyńyz uzaq, denińiz saý bolsyn», degen Erlan Qýanyshuly aqyn anaǵa arnaǵan syılyǵyn tabystady.
Arqaly aqynnyń shyǵarmashylyq keshine Qazaqstannyń eńbek sińirgen qaıratkeri, halyqaralyq «Alash» syılyǵynyń laýreaty, «Qurmet» ordeniniń ıegeri, jazýshy-dramatýrg, tarıhshy Erkinbek Turysov jáne Beket Turǵaraev, Marhabat Baıǵut, Narmahan Begalyuly, Baıan Tilenshına, Sársen-Bek Sahabat syndy zııaly qaýym ókilderi aqynnyń shabytty shyǵarmashylyǵy jolyndaǵy el úlgi alar, keleshekke tanymdy, tálimdi iz salar isteri jóninde oı bólisti.
Ońtústikten juldyzdaı jarqyraı shyǵyp, dúıim el aldynda qara sózdiń qadiri men qasıetin oramdy oı, ótkir de shyraıly tilmen tyńdarman júregine jetkizip, qoǵamǵa qozǵaý salar sardar sózdi tergen aqynnyń shákirtteri Marjan Esjanova, Anar Japparqulova, Dáýren Aqsaqalovtar ustazdaryna jyrdan shashý shashyp, qazirgi tańda ustazdan úlgi alǵan shákirtter ustazǵa aınalyp, jańa býynnyń óner jaýqazyndaryn jaıqaltýǵa kúsh salyp jatqandyqtaryn da jetkizdi.
Rýhanı mánge toly mádenı sharany qalalyq «Otyrar ǵylymı-ámbebap kitaphanasynyń dırektory Kúlııa Aıdarbekova júrgizdi. Kesh aıasynda aqynnyń sózine jazylǵan ánder shyrqalyp, óleńderi oqyldy.