Aqtóbe oblysynyń ákimdigi men «Qazaqstannyń turǵyn úı qurylys jınaq banki» AQ basqarmasy arasynda «Nurly jer» baǵdarlamasyn iske asyrý aıasynda atalǵan bankten jeke depozıt ashqan aqtóbelik azamattardyń sany 90 myńǵa jetip otyr.
Sondaı-aq óz kezeginde bank búginge deıin óńir turǵyndarynyń «Nurly jer» baǵdarlamasy sheńberinde tıisti baspanaǵa qol jetkizýi úshin 20 mıllıard teńgeden astam qarajat aýdarǵan. Bul soma jyl aıaǵyna deıin taǵy da 2 mıllıard teńgege ósedi dep kútilýde. Iаǵnı atalǵan bank óńirdegi óz salymshylaryna materıaldyq qoldaý kórsetý men kómek berý sharalaryn odan ári jalǵastyra bermek. Bul rette oblys ákimi Berdibek Saparbaev pen «Qazaqstannyń turǵyn úı qurylys jınaq banki» AQ Basqarma tóraıymy Lıazzat Ibragımova arnaıy kelisimge qol qoıdy. Bank basshysynyń aıtýynsha, jeke turǵyn úıdi ıelenýde aqtóbelikter el óńirleri arasynda kósh bastap keledi. Ásirese olar bastapqy jarna tóleý isinde belsendi. Osyndaı oń kórinis óz kezeginde QTQJB-nyń óńirdegi salymshylary úshin kóbirek qarajat aýdarýyna ári paıyzdyq mólsherlemeniń kemı túsýine septigin tıgizdi.
Osylaısha Aqtóbe oblysynda «Nurly jer» memlekettik baǵdarlamasy aıasynda turǵyn úı zaımynyń alǵashqy jarnasy 20 paıyzdan 10 paıyzǵa tómendetildi. Bul jeńildikti baspana kezeginde turǵan QTQJB salymshylary «Nur Aqtóbe» turǵyn úı alabyndaǵy bir bólmeli páterlerdi satyp alý kezinde paıdalana alady.
Jergilikti bılik olar úshin birinshi kezekte 250 mıllıon teńge bóldi. Bul qarajat banktiń 500-den asa salymshysynyń alǵashqy jarnasyn tómendetýge múmkindik bermek. Qazirgi kúni «Nur Aqtóbedegi» taza árleýdegi 1 bólmeli páterdiń bir sharshy metriniń quny 100-120 myń teńgeni quraıdy. Páterlerdiń jalpy aýdany − 32-54 sharshy metr aralyǵynda.
− Salymshyda baspana qunynyń 10 paıyzy bolý kerek. Alǵashqy jarnanyń qalǵan 10 paıyzyn ákimdik bıýdjetten beredi. Ony qaryz alýshy 5 jyl ishinde aı saıyn 8250 teńgeden qaıtarady. Páter qunynyń qalǵan bóligin «Turǵyn úı qurylys jınaq banki» jyldyq mólsherlemesi 5 paıyzdyq jeńildetilgen qaryzben usynady, − dedi L.Ibragımova.
Árıne mundaı jeńildik kez kelgen azamatqa usynyla bermeıdi. Oǵan tek «Nurly jer» baǵdarlamasy sheńberinde turǵyn úı kezeginde turǵan ári tólem qabileti rastalǵan azamattar ǵana qatysa alady. Sondaı-aq olardyń jeke menshiginde ózge baspanasy bolmaýy kerek. Tutastaı alǵanda jyl aıaǵyna deıin óńirde 870 myń sharshy metr turǵyn úı paıdalanýǵa berilmek. Ony ıelenetin turǵyndardyń arasynda «Turǵyn úı qurylys jınaq banki» salymshylarynyń úlesi joǵary.
Temir Qusaıyn,
«Egemen Qazaqstan»
AQTО́BE