«Nur Otan» partııasynyń Májilistegi fraksııasy janyndaǵy Ekonomıkalyq saıasat jónindegi keńestiń kezekti otyrysy «Sıfrly Qazaqstan» memlekettik baǵdarlamasynyń iske asyrylý barysyna arnaldy. Keńes otyrysyna depýtattarmen qatar, memlekettik organdardyń, «Atameken» ulttyq kásipkerler palatasynyń jáne qoǵamdyq uıymdardyń ókilderi qatysty.
Jıyndy ashqan Ekonomıkalyq saıasat jónindegi keńes tóraǵasy, Májilis depýtaty Beıbit Mamraev óz sózinde Memleket basshysy Nursultan Nazarbaev Qazaqstan halqyna arnaǵan bıylǵy Joldaýynda elimizdi sıfrlandyrý keńistigin keńeıte túsý jóninde tapsyrma bergendigin eske saldy.
Al negizgi baıandamashy Aqparat jáne kommýnıkasııalar mınıstriniń orynbasary Dınara Sheglova elimizdegi sıfrlandyrý baǵdarlamasynyń basty baǵyttary boıynsha atqarylyp jatqan is-sharalar týraly aıtyp berdi.
Máselen, onyń aıtýynsha, memlekettik baǵdarlama basty bes baǵyt pen 17 bastamadan turady. Atap aıtqanda, ekonomıka salalaryn sıfrlandyrý, sıfrly memleketke kóshý, sıfrly Jibek jolyn iske asyrý, adam kapıtalyn damytý jáne ınnovasııalyq ekojúıeni qurý salalarynda aıtarlyqtaı ilgerileýshilikter anyqtalǵan.
– Qazirdiń ózinde «Sıfrly Qazaqstan» memlekettik baǵdarlamasynyń is-sharalaryn oryndaý boıynsha joǵary nátıjeler baıqalýda, – degen vıse-mınıstr bes baǵyttyń árqaısysy boıynsha naqty kórsetkishterge toqtaldy.
Máselen, munaıdy barlap, óndirý prosesteri sıfrlandyrýmen qamtylǵan. Osynyń nátıjesinde zııatkerlik ken oryndaryn engizý arqyly alynatyn munaı koeffısıentin 5 paıyzǵa arttyrýǵa jáne operasııalyq shyǵyndardy 10 paıyzǵa jáne jóndeý aralyq kezeńdi 8 paıyzǵa qysqartýǵa qol jetkizilgen. Mundaı úderispen qamtylǵan atom óndirisinen bastap, memlekettik qyzmet, aýyl sharýashylyǵy, densaýlyq saqtaý, bilim, saýda salalarynda shyǵyndar azaıyp, eńbek ónimdiligi men tabys artyp keledi.
– Qazirgi kezde sıfrlandyrýdy qajet etetin bes basym baǵyt anyqtaldy. Bul – bilim berý, densaýlyq saqtaý, qaýipsizdik, turǵyn úı jáne kommýnaldyq sharýashylyq salalary, – dedi D.Sheglova.
Keńes otyrysynda Investısııalar jáne damý mınıstriniń orynbasary A.Qabykenov, «Atameken» ulttyq kásipkerler palatasy tóraǵasynyń orynbasary O.Ordabaev sıfrlandyrý baǵdarlamasynyń iske asyrylýy boıynsha aqparattarymen bólisti. Sondaı-aq Atyraý qalasynda ornalasqan «Embimunaıgaz» AQ departamentiniń dırektory B.Nysanbaev jınalǵandarǵa «Zııatkerlik ken orny» jobasy týraly aıtyp berdi.
Otyrysty qorytyndylaı kele B.Mamraev sıfrlandyrýdyń halyqaralyq standarttarǵa saı qoǵamnyń áleýmettik ósýine de, ekonomıkalyq máselelerdi keshendi sheshýge de baǵyttalǵan ındýstrııalyq-ınnovasııalyq damý baǵdarlamasyn iske asyrýda mańyzdy ról atqaratyndyǵyn atap ótti.
Keńes otyrysynyń qorytyndysy boıynsha «Sıfrly Qazaqstan» memlekettik baǵdarlamasyn iske asyrý boıynsha memlekettik jáne basqa da jaýapty organdarǵa usynystar qabyldandy.
Serik ÁBDIBEK,
«Egemen Qazaqstan»