Oblystyq aýyl sharýashylyǵy basqarmasynyń málimetinshe, aýa raıynyń qubylmaly bolýyna qaramastan, óńirde kúzgi jıyn-terim naýqany tabysty aıaqtaldy. Bıyl óńirde 900 myń tonna astyq jınalǵan. Astyq jınaýdan Jelezın, Ertis aýdandary jyldaǵydaı joǵary kórsetkishtermen alǵa shyqty. Sharbaqty aýdanyndaǵy «Pobeda» JShS jasymyq ósirip, Túrkııaǵa eksporttaýda.
Qazirgi tańda óńirde 2022 jylǵa deıin sýarmaly alqaptardyń kólemin 4,6 esege arttyrýǵa daıyndyq jumystary júrgizilýde. Máselen, Aqsý aýyldyq aýmaǵyna qarasty «Tımýr» sharýa qojalyǵy 2 myń gektar jeriniń 850 gektaryn sýarmaly sharýashylyqqa paıdalanýda. Sharýashylyq kartop, sábiz ósiredi. Bıyl gektarynan 450-500 sentner kartop pen 750-850 sentnerden sábiz jınady.
Seriktestik basshysy Ravıl Mıngazov sharýashylyqty damytýǵa 2,5 mlrd teńge jumsaǵan. 8 myń tonna kartop pen myń tonna sábiz saqtaıtyn qoıma da salypty. Osylaısha sýarmaly egis sharýashylyǵynyń tıimdiligin kórip otyr.
Aýyl sharýashylyǵy basqarmasynyń málimetinshe, búginde oblys aýmaǵynda Keńestik kezeńnen qalǵan 75 myń gektar sýarmaly alqap bar eken. Sondyqtan «Sýarmaly eginshilikti damytý» keshendi baǵdarlamasy boıynsha árbir aýdanda
7 myńnan 20 myń gektarǵa jýyq jer bar ekeni anyqtaldy. Endigi maqsat – osy jerge áleýmettik-kásipkerlik korporasııasy arqyly ınjenerlik ınfraqurylym tartý.
Al «Pobeda» JShS bolsa, byltyr da, bıyl da 3 myń gektar jasymyq egip, ónimniń 1200 tonnasyn Túrkııaǵa jóneltipti. Sharýashylyq barlyǵy 20 myń gektar jerge astyq egedi.
Qazir alqaptarda maıly daqyldardy jınaý jumystary áli de jalǵasýda. Kartoptyń 518 myń tonnasy, kókónisterdiń 200 myń tonnasy jınaldy. Baqsha daqyldary da mol. Mysaly, Pavlodar aýdanyna qarasty Chernoıarka aýylynda sharýashylyqtar kókónisterdi qazyp alyp, birden sol jerde ónimderin satýda.
Basqarmanyń málimetinshe, bıyl da astyq jınaý boıynsha gektarynan 13 sentnerden joǵary ónim alǵan Jelezın men Ertis aýdandary alda keledi. Ertis aýdanynda jalpy kólemi 182 myń gektardan astam astyqty alqap bar.
О́ńirde «Jolqudyq elevatory», «ATO Sharbaqty elevatory», «Myńkól elevatory» JShS-lary, «Agro» fırmasy, «Pavlodarlyq Nıva» jáne «Ertis Agro» kásiporyndary jalpy kólemi 264,3 myń tonna astyq qabyldaı alady. Buǵan qosa kóptegen orta jáne iri sharýa qojalyqtardyń jeke astyq qoımalary bar. Astyqtyń ylǵaldylyǵy az bolsa, elevatorlarǵa tasymaldamaı-aq, jınalǵan ónimderin qoımalarda saqtaıtyn kórinedi. Kúzgi jıyn-terimniń dámi kóktemde bilinedi.
О́ńirde jalpy kólemi 1 mıllıon 519 myń gektar shabyndyqtan 1311 myń tonna shóp daıyndaldy. Kúzgi dala jumystaryn júrgizý úshin 21 myń tonna dızel otyny bólingen. Dızel otyny sharýalarǵa arzandatylǵan baǵamen satyldy.
Farıda BYQAI,
«Egemen Qazaqstan»
Pavlodar oblysy