Osydan jeti jyl buryn qarashanyń qara sýyǵynda Jambyl jurtshylyǵyn ǵana emes, búkil qoǵamdy dúr silkindirgen oqıǵa oryn alǵan bolatyn. Taraz kóshelerinde beıbit turǵyndardyń tynyshtyǵyn buzyp, oq atqan lańkesti quryqtaý kezinde jergilikti polısııa qyzmetkerleri erlikpen qaza tapty. Búginde beıbit kúnniń batyrlaryn jyl saıyn eske alyp, olardyń rýhyna taǵzym etý dástúrge aınalǵan. Ǵazız Baıtasov, Polat Aıanqulov, Jaqsybek Baıseıitov sııaqty azamattardyń erligi eshqashan umytylmaıdy.
Qala ortalyǵyndaǵy «Jeltoqsan» skveriniń mańyndaǵy Halyq Qaharmany Ǵazız Baıtasovtyń bıýsti mańyna Jambyl oblystyq polısııa departamentiniń qyzmetkerleri jáne batyrdyń týystary jınalyp, eske alý sharasyn ótkizdi. Jıynda departament bastyǵy, polısııa polkovnıgi Arman Orazalıev sóz alyp, erliktiń eshqashan umytylmaıtynyn, syn saǵatta qaza tapqan azamattardyń esimi árdaıym halyq jadynda ekenin aıtty. «Biz táýelsiz Otanymyzǵa adal qyzmet etken erjúrek jigitterimizdi joǵalttyq. Lańkes qolynan qaza tapqan jambyldyq polıseıler Ǵazız Baıtasov, Polat Aıanqulov, Jaqsybek Baıseıitov qıyn sátte halyq múddesin bárinen joǵary qoıatyn naǵyz batyl, otansúıgish azamattar edi. Olardyń erligi – Otan aldyndaǵy qyzmet etýdiń naǵyz úlgisi», dedi ol.
Sonymen qatar Halyq Qaharmanyn eske alý sharasynda oblystyq mektep olımpıadalaryn jáne mektepten tys is-sharalardy ótkizetin ortalyqtyń jasóspirimderden quralǵan «Polısııa akademııasynyń» músheleri ant qabyldady. О́z kezeginde polısııa kapıtany Ǵazız Baıtasovtyń jary Gúlmıra Tájıeva «Árdaıym Ǵazızdy eli umytpaı eske alyp, erligine taǵzym etýde. Uldary ósip kele jatyr. Úlken uly áke jolyn jalǵastyryp, joǵary oqý ornynda zań fakýltetinde oqyp júr. Bolashaǵymyz qashanda jarqyn bolsyn», deı kele batyr uldyń rýhyna taǵzym etken kópshilikke alǵysyn bildirdi.
Qapııada qaza tapqan beıbit kúnniń batyrlary rýhyna arnap Arman Orazalıev bastaǵan jambyldyq polıseıler Ǵazız Baıtasovtyń bıýstine gúl shoqtaryn qoıdy. Erlik eldikpen birge máńgi jasaı beretinin eske saldy.
Hamıt ESAMAN,
«Egemen Qazaqstan»
Jambyl oblysy