Týǵan jerdi túletý, sáni men saltanatyn arttyryp, adamdardyń alańsyz kún keshýine jaǵdaı jasaý − er-azamattardyń boryshy. Oblysta mundaı jaqsy mysaldar jetkilikti. Taıaýda oblys ortalyǵyndaǵy «Dostyq» úıinde Qazaqstan halqy Assambleıasynyń Aqmola oblystyq bólimshesiniń uıymdastyrýymen el jaıyn oılaǵan jomart júrekti jandardy marapattaýdyń sáti tústi.
Kindik qany tamǵan ata jurttyń ajary men bazary ortaımaýy kerektigi týraly Elbasy Nursultan Nazarbaev «Rýhanı jańǵyrý» baǵdarlamasynda da jan-jaqty aıtqan bolatyn. Týǵan ólkesin túletip, óńir ómirin jaqsartýǵa atsalysýshylar osy baǵdarlamadan keıin tyń serpinmen óz úlesterin qosa bastady. «Jomart júrek» baıqaýy − elim dep emirengen azamattardyń el damýyna qosqan úlesin saralap, salmaqtaýǵa baǵyttalǵan mańyzdy jobalardyń biri. Bul keshte el bolashaǵyna beıjaı qaraı almaıtyn azamattardyń atqarǵan eńbekteri jalpaq jurtqa áıgili boldy.
– Sońǵy eki jyldyń ishinde oblysta jalpy quny 5,5 mıllıard teńgeni quraıtyn 96 áleýmettik joba júzege asyryldy, – dedi oblys ákiminiń orynbasary Aına Mysyrálimova quttyqtaý sózinde, – olardyń basym bóligi bilim, mádenıet, sport salalary. Bir ǵana Selınograd aýdanynyń ózinde jalpy quny 500 mıllıon teńgeni quraıtyn 9 joba iske asyryldy.
Saltanatty sharada «Jyl mesenaty» atalymy boıynsha Sandyqtaý aýdanynyń «Svobodnoe» seriktestiginiń dırektory Aleksandr Zakýsılov, Esil aýdany «Zarechnyı» seriktestiginiń dırektory Ýálıhan Áripov, «Týǵan ólke» atalymy boıynsha Qorǵaljyn aýdanynan jeke kásipker Quralaı Túsipbekova men «Grýppa Kompanıı...» seriktestigi dırektorlar keńesiniń jetekshisi Ardaq Baltabekov jáne Selınograd aýdany «Kókshe Jemchýg» seriktestigi basshysynyń orynbasary Qanat Jákenov, Selınograd aýdanynan isker azamat Baýyrjan Isabaev pen «Sandyqtaý» seriktestiginiń dırektory Jamýl Mýshanov marapattaldy. Selınograd, Sandyqtaý aýdanynyń ákimdikteri «Týǵan jer» baǵdarlamasy boıynsha úzdikter qatarynan kórindi.
Baıqal BAIÁDIL,
«Egemen Qazaqstan»
Aqmola oblysy