Kúres túrlerinen 23 jasqa deıingi balýandar arasynda Rýmynııanyń bas shahary – Býhareste ótken álem birinshiliginde 72 kılo salmaq dárejesinde qola medaldi ıelengen Jámıla Baqbergenovany jerlesteri qushaq jaıa qarsy aldy.
Baıraqty básekede Qazaq eli namysyn abyroıly qorǵaǵan sportshyny Almaty áýejaıynan Almaty oblysy Jambyl aýdanynyń ákimi Baǵdat Álıevtiń ózi qarsy alyp, qoshemet kórsetti. Sodan sol óńirdiń atqaminerleriniń barlyǵy da Jámılıa Baqbergenovanyń kindik qany tamǵan jeri – Jambyl mýzeıi aýylyn betke aldy. Mádenıet úıiniń aldynda aýyl aqsaqaldary – Baqyt Balaıuly men Janat Turapuly balýan qyzǵa aq batasyn berse, Sochıde ótken jas ánshiler konkýrsynyń laýreaty Marǵulan Dúıseke men termeshi Ermek Shashtaıuly jyrdan shashý shashty. «Álqıssa» óner mektebiniń oqýshylary kúı tartyp, talaı jyr men ánge arqaý bolǵan Maıtóbeniń baýraıyn aıryqsha dýmanǵa bóledi. Sportshyǵa jabýymen sáıgúlik mingizdi. Al Jámılanyń ózi osylaı alaqandaryna salyp aıalap, qurmet pen qoshemet kórsetken jerlesterine zor rızashylyǵyn bildirip, aldaǵy dúbirli dodalarda da barynsha tabysty óner kórsetip, el senimin aqtaý úshin esh aıanyp qalmaıtynyn jetkizdi.
Sporttyń soqpaǵyna túskeli beri Jambyl mýzeıi aýylynyń týmasy Jámıla Baqbergenovanyń talaı bıik belesterdi baǵyndyrǵanyn jankúıerler jaqsy biledi. Ol – kadetter arasynda Azııa chempıony, álem birinshiliginiń qola júldegeri, jastar arasynda da qurlyqtyq jáne jahandyq dodalarda birneshe márte jeńis tuǵyryna kóterildi. 2016 jyldan beri áıelder saıysynda kúsh synasyp júrgen jerlesimiz Islam yntymaqtastyǵy oıyndary jáne dańqty balýandar – Aleksandr Medved pen Ivan Iаrygınniń týrnırinde de júldegerler qatarynan kórindi. Basqa da jarystarda jeńip alǵan júldeleri jeterlik.
Býhareste jalaýy jelbiregen jarysta Jámıla japonııalyq Narýtý Masýıýkı men amerıkalyq Reıchel-Enn Ýottersti utyp, jartylaı fınalda Býse Tosýnge ese jiberdi. Odan keıin Naıný Naınýdyń tas-talqanyn shyǵaryp, qola medaldi moınyna ildi.
Ǵalym SÚLEIMEN,
«Egemen Qazaqstan»