Ekaterınbýrg qalasyndaǵy qandastar arasynda oblystyq «Evrazııa-Qazaqstan» aımaqtyq qoǵamdyq uıymynyń vıse-prezıdenti Ǵalııa Amanjolovanyń bastamasymen qazaq tili kýrsy júre bastady. Oǵan tilek bildirýshiler jas erekshelikterine qaramaı qatysa alady. Qazir zańger Nıkıta Kýteınıkov, 9 synyp oqýshysy Ádilbek Toqbaev, medısına qyzmetkeri Sulýshash Beısembaeva, kadrlar bóliminiń ınspektory Marına Seıdahmetova, qurylysshy Dáýren Seıdahmetov, taǵy basqalar kýrsqa kelip júr.
«Bizde qazaq tiliniń mamany joq. Sondyqtan qazaq tilin jaqsy biletin kisilerdiń úıretkenin qanaǵat tutamyz. Munyń ózi Qostanaı oblystyq tilderdi damytý basqarmasy mamandary kómeginiń arqasynda múmkin boldy. Atamekenniń mundaı kómegine alǵysymyz sheksiz. Ekaterınbýrg qalasynda turatyn Gúlden Qaraeva men Elmıra Aldamjarova qazaq tilin jetik biledi, olar Tóleýtaı Jumanııazǵa kómektesip, ynta tanytqandarǵa qazaq tilin úıretedi » deıdi Ǵalııa Baqytqyzy.
Qostanaı oblystyq Tilderdi damytý basqarmasynyń jáne Til úıretý ortalyǵynyń mamandary Reseıdiń Qostanaıǵa irgeles Chelıabi oblysyndaǵy qazaqtarǵa til úırenýdiń ońaı, jeńil baǵdarlamasyn, basqa da ádistemelik quraldar berip turady. Sonymen qatar til úıretýge belsendilik kórsetken reseılik qazaqtardy jyl saıyn bir apta oqytyp, sertıfıkat tapsyrady. Endi olar Sverdlov oblysyndaǵy qazaqtarǵa da kómek qolyn sozyp otyr.
«Biz Ekaterınbýrgtegi qandastarymyzǵa qazaq tilin oqytýǵa arnalǵan ádistemeler, oqý quraldary jáne sózdikter, «tilasharlar» berdik. Kelesi jyly qazaq tilin úıretý jumysynda chelıabiliktermen qatar Sverdlov oblysyndaǵy qazaqtardy da qamtıtyn bolamyz. Olardan da qazaq tilin jaqsy biletin belsendilerdi shaqyryp nemese ózimizdiń mamandardy sonda jiberip, qazaq tilin oqytýdyń ádistemelerin úıretetin bolamyz» deıdi Oblystyq tilderdi damytý basqarmasynyń bólim basshysy Baqytgúl Súleımenova.
Qostanaılyq mamandar aldaǵy jyldan bastap Reseıdiń kórshi oblystaryndaǵy qandastarǵa latyn grafıkasyndaǵy álipbıdi de úıretetin bolady.
Názıra Járimbet,
«Egemen Qazaqstan»
Qostanaı