Shamalǵan aýylyndaǵy Qazaqstan Respýblıkasynyń Tuńǵysh Prezıdenti – Elbasynyń «Atameken» tarıhı-mádenı ortalyǵy osydan bir jyl buryn ashylǵan bolatyn.
Osy merzim aralyǵynda Elbasynyń kindik qany tamǵan aýyldaǵy rýhanııat ordasynan adam aıaǵy arylǵan emes. О́ıtkeni bul ortalyq Nursultan Nazarbaevtyń Memleket basshysy retindegi órnekti ómir jolynan syr shertip qana qoımaı, tutas elimizdiń táýelsizdik tarıhynan mol maǵlumat beretin mekenge aınaldy.
Ortalyqtyń ashylý sátinde Tuńǵysh Prezıdent – Elbasy qorynyń atqarýshy dırektory Qanat Jumabaev erekshe syı retinde Memleket basshysynyń 2001 jyly mingen qyzmettik avtokóligin tartý etken edi. Prezıdentke qyzmet kórsetken sol «Mersedes» mashınasy qazir rýhanı ortalyqqa kelýshilerdiń qyzyǵa tamashalaıtyn eksponatyna aınalypty.
– Ortalyq bir jyldyń ishinde el kóńilinen oryn taýyp, kelýshilerdiń qyzyǵýshylyǵyn oıatqan rýhanı orynǵa aınaldy. Buǵan deıin Nursultan Nazarbaevtyń ómir jolynan syr shertetin tanymdyq ortalyqtyń mindetin Shamalǵandaǵy orta mektep janyndaǵy mýzeı atqaryp kelgen edi. Al «Atameken» tarıhı-mádenı ortalyǵy shamalǵandyqtar ǵana emes, tutas elimizdiń maqtanyshy bolatyndaı rýhanı keshenge aınaldy, – deıdi ortalyq dırektory Jámılá Elǵondıeva.
Aıtpaqshy, munda kelýshilerdi qyzyqtyratyn eksponattyń biri – Memleket basshysy paıdalanǵan úkimettik avtokólik dedik. Ásirese ortalyqqa jıi keletin mektep oqýshylary Elbasy mingen kólikti aınalshyqtap júredi eken.
Jalpy, bul ortalyqtyń altyn qoryna jınalǵan barlyq eksponattar Elbasynyń balalyq shaǵynan bastap egemen eldiń Kóshbasshysyna aınalǵanǵa deıingi kezeńdi qamtıdy. Qundy jádigerlerdi jınaqtaýǵa Shamalǵandaǵy tarıhı ólketaný murajaıy, orta mekteptiń ujymy jumylsa, Memleket basshysynyń jazba eńbekteri men tanymdyq fotosýretteri, ár jyldarda jaryq kórgen kitaptary Elbasy kitaphanasy men Ulttyq kitaphana muraǵatynan alynyp, el nazaryna usynylýda.
Qalmahanbet MUQAMETQALI,
«Egemen Qazaqstan»
Almaty oblysy