Túrkistan oblysynyń Qazyǵurt aýdanynda jemister men kókónisterdi óńdeýge basymdyq berilýde. Bul oraıda quny – 50 mln. teńgelik «Unifrutti gold» JShS-niń dıetalyq pıýreler shyǵarý jobasy júzege asyryldy.
Aýdan kóleminde búgingi tańda jumys istep turǵan 18 kásiporyn bar. Aǵymdaǵy jyldyń 10 aıynda óńirdegi ónerkásip kásiporyndarynda 5 mlrd. 633 mln. teńgeniń ónimi óndirilip, ótken jyldyń tıisti kezeńimen salystyrǵanda naqty kólem ındeksi 103,9 paıyz bolǵan. Túrkistan oblysynyń О́ńirlik kommýnıkasııalar qyzmetinde ótken brıfıngte Qazyǵurt aýdanynyń ákimi Tólegen Telǵaraev ónerkásip ónim kóleminiń jyl saıyn artýyna ındýstrııaldyq aımaqtyń úlesi mol ekenin atap ótti. Búgingi tańda jalpy aýmaǵy - 13 gektar «Qazyǵurt» ındýstrııaldyq aımaǵynda 1,9 mlrd. teńge bolatyn 7 jobaǵa jer telimi berilgen. 2016-2017 jyldary 3 joba iske asyrylsa, 2018 jyly 589 mln. teńgelik tabıǵı shyryn sýsyn óndiretin «Kórik ShQ» JShS-i jumysyn bastady. Júzege asyrylǵan jobanyń taǵy biri – quny 85 mln. teńge «Qazyǵurt aına» JShS-niń suıyq shyny óndirisi. Al 3 jobany 2019 jyly iske qosý josparlanǵan. Sondaı-aq aldaǵy jyly ındýstrııaldy aımaqta iske qosylatyn jobalardyń arasynda jalpy quny 602,7 mln. teńgeni quraıtyn qurǵaq sút jáne sary maı óndiretin «Asyl bastaý KZ» JShS-i, quny 125 mln. teńgelik «Aq-nıet 5» О́K-niń «temir beton ónimderi» jobasy jáne quny 112,7 mln. teńge «KN eksport 777» JShS-ń «jıhaz shyǵarý» jobasy bar.
Aýdanda 94 shaǵyn joba iske qosylyp, 405 adam turaqty jumyspen qamtylǵan. Budan ózge, shaǵyn jáne orta kásipkerler sany 8226-ǵa jetip, 114,6 paıyzǵa ósken. Kásipkerlik salasyn damytý maqsatynda qarjy uıymdarynan 2018 jyldyń 10 aıynda 4565 tulǵaǵa 2414,8 mln. teńge nesıe berilgen.
Ǵalymjan ELShIBAI,
«Egemen Qazaqstan»
Túrkistan oblysy