Memlekettik qyzmet isteri jáne sybaılas jemqorlyqqa qarsy is-qımyl agenttiginiń Mańǵystaý oblysy boıynsha departamentiniń memlekettik kórsetiletin qyzmetter basqarmasy jáne oblystyq bilim basqarmasynyń ókilderi, Aqtaý qalasynda ornalasqan joǵarǵy jáne arnaýly orta bilim berý uıymdarynyń memlekettik qyzmet kórsetý jaǵdaıymen tanysty.
Ǵımarattardy aralaý barysynda «Yessenov University» stýdentterge qyzmet kórsetý ortalyǵy tolyqqandy qyzmet jasap turǵandyǵy, stýdentter úshin qolaıly jaǵdaıdyń jasalǵandyǵy baıqaldy. Qyzmetter alý kezindegi jappaı keptelisti boldyrmaý úshin arnaıy elektrondy kezektilik jáne termınal ornalastyrylǵan.
Budan keıin, mamandar Aqtaý qalasynda ornalasqan arnaýly orta bilim berý uıymdaryn (kolledjderdi) aralap, óz ózine qyzmet kórsetý buryshtary men stýdentterge memlekettik qyzmet kórsetýdiń tártibin is júzinde kórip shyqty.
Olardyń ishinde Halel О́zbekǵalıev atyndaǵy Mańǵystaý polıtehnıkalyq kolledjiniń «Bir tereze» qaǵıdatyn naqty ustanyp, stýdentter úshin arnaıy qyzmet kórsetý ortalyǵy men kórnekti jerde óz-ózine qyzmet kórsetý buryshy tıisti deńgeıde uıymdastyrylǵan.
Jumys toby bilim alýshylarmen tildesip, qyzmet kórsetý sapasyna qatysty usynys-pikirlerin tyńdady. Biraq, bul jumystardy uıymdastyrý kolledjderdiń barlyǵynda birdeı óz dárejesinde oryndalmaǵan.
Mysaly, Mańǵystaý energetıkalyq kolledjinde stýdentterdiń ózine-ózi qyzmet kórsetý buryshynyń qyzmetimen tanysý úshin jaǵdaı jasalmaǵan, qyzmet alýshylardyń, ıaǵnı stýdentter sapaly qyzmet ala almaı álek. Mańǵystaý gýmanıtarlyq kolledjinde atalǵan servıstiń stýdentter úshin qolaısyz jerde ornalasqan jáne aqparattandyrýǵa baılanysty jol kórsetý belgileriniń bolmaýy sııaqty kemshilikter kezdesti.
Al, Mańǵystaý týrızm kolledjiniń ǵımaraty bolsa talapqa saı, ári barlyq qajetti tehnıkalyq quraldarymen, oqý tájirıbelik jumystar úshin joǵarǵy deńgeıde oryndardyń erekshe jabdyqtalýy, qyzmet kórsetý ornyndaǵy mamandardyń biliktiligi aıqyn kórinip turdy.
Qoryta kelgende ýákiletti organ tarapynan oqý oryndarynyń basshylaryna oryn alǵan kemshilikterdi joıý jóninde usynystar berildi. Al onyń oryndalýyn baqylaý oblystyq bilim basqarmasymen júzege asyrylatyn bolady.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy