Qazaqstan Respýblıkasy Tuńǵysh Prezıdenti kúnine oraı, «Ejelgi Taraz eskertkishteri» tarıhı-mádenı qoryq-mýzeıiniń uıymdastyrýymen «Elbasy jáne Uly Dala murasy» taqyrybynda Jambyl oblystyq tarıhı-ólketaný mýzeıinde kórme ótti.
Kórmege mýzeı qoryndaǵy 185-ten astam qundy jádigerler toptamasy jáne de Elbasynyń «Kóne Taraz» mýzeıine kelgendegi tarıhı fotosýretteri qoıyldy. Tarazdyqtar aıtýly mereke qarsańynda mýzeıdegi túrli qundy jádigerlermen tanysyp, Elbasynyń Áýlıeata óńirine kelgen saparyndaǵy sýretterin tamashalady. Budan bólek, ultymyzdyń uly tarıhynan syr shertetin kóne jádigerler de mýzeı tórinen tabyldy.
«Munda Túrgeshter zamanynda soǵylǵan kúmis, qola teńgeler, Qytaımen saýda-sattyq barysynda kelgen qytaılyq teńgeler men buıymdar, Qarluq qaǵanatynyń áshekeı buıymdary men turmystyq zattary, Qarahandar dáýiriniń mádenıetinen syr shertetin kúmis pen qoladan jasalǵan baqyr teńgeler, bútindeı kómbe kúıinde tabylǵan áıel adamnyń altyn, kúmis áshekeıleri, bilezikter, syrǵalar, monshaqtar jáne suıyqtyq saqtaýǵa arnalǵan synapkózder, qoladan quıylǵan shyraǵdandar jáne Úısin dáýirine jatatyn qola aına men shash túıregish bar. Bulardyń barlyǵy da bizdiń mádenıetimizdiń óte joǵary dárejede damyǵanyn kórsetedi», deıdi «Ejelgi Taraz eskertkishteri» tarıhı-mádenı qoryq-mýzeıi dırektorynyń orynbasary Qýanysh Dáýrenbekov.
Kórmeniń basty maqsaty eki myń jyldan astam tarıhy bar «Ejelgi Taraz» qalashyǵynan tabylǵan baǵa jetpes qundy jádigerlerdi qala turǵyndary men qonaqtaryna tamashalatý boldy. Sonymen qatar, mýzeı qyzmetkerleri kózdiń qarashyǵyndaı saqtap, bolashaq urpaqqa qaldyrǵan ult muralaryn nasıhattaý jáne urpaq kádesine jaratý da birinshi orynda. Bul rette kelýshiler kórmeniń basty maqsaty jas urpaqty ulttyq rýhta tárbıeleý jáne qalamyzdyń tarıhynyń zor máni bar ekenin túsindirýge shaqyrǵanyn da umyt qaldyrmady. Atalǵan kórme aǵymdaǵy jyldyń jeltoqsan aıynyń úshinshi onkúndigine deıin jalǵasatyn bolady.
Hamıt Esaman,
«Egemen Qazaqstan»
Jambyl oblysy